Los llectores d’Asturies.com, esperanzaos col discursu d'Emilio Marcos Vallaure sobre l’asturianu

Un 58 por cientu de los usuarios d’Asturies.com señala que’l discursu de Vallaure sobre l’asturianu, nel qu’anunció un Plan de Normalización, tresmite-y optimismu. Un 27 por cientu diz que les pallabres del conseyeru nun-y convencen.
 
El pasáu 26 de setiembre, el conseyeru nuevu de Cultura y Deporte comunicó en comisión na Xunta Xeneral les llinies que va siguir la política del so departamentu, faciendo especial énfasis nel tema del asturianu. Asina, Vallaure, qu’usó la llingua asturiana na so intervención, anunció un Plan de Normalización 2012-2015 y el desarrollu de la Llei d’Usu. Dos cuestiones que-yos tresmite optimismu al 58 por cientu de los nuesos llectores por un 27 por cientu qu’afirma lo contrario. Mentes, un 15 por cientu escoyó la opción ‘nun sé’y prefiere esperar acontecimientos.
 
Estes cifres, pese a ser altes, nun lleguen al 82 por cientu de persones que dixeron que-y gustaba’l nomamientu de Vallaure como conseyeru de Cultura y Deporte nel nuesu ‘Conceyu Abiertu’ zarráu’l 3 d’agostu pasáu. Naquella ocasión, namái un 5 por cientu señaló que l’ex direutor del Muséu de Belles Artes nun-y gustaba.
 
Otra, manera, yá pue votase una nueva encuesta en ‘Conceyu Abiertu’. Nesta ocasión queremos conocer cuál ye la opinión de los nuesos llectores sobre cuál debe ser el futuru de la RTPA.