Los llectores d’Asturies.com creen que la fuelga xeneral nun va camudar les politiques del Gobiernu de Rajoy

Un 81 por cientu de los usuarios d’Asturies.com opina que la fuelga xeneral del día 14 nun va llevar al Gobiernu del PP a camudar les sos politiques. El paru tuvo un siguimientu del 92 por cientu nel país, según los sindicatos mayoritarios.

La mayoría de los llectores que participaron nel nuesu ‘Conceyu Abiertu’, pese a que la práutica totalidá, por estadística, participó nel paru, cree que la fuelga xeneral nun va servir pa que’l Gobiernu de Mariano Rajoy modere la so política de recortes y el so ataque al Estáu del bienestar. Mentes, un 13 por cientu sí considera que la protesta ciudadana va valir pa que’l Partido Popular (PP) modere les sos aiciones, por un 6 por cientu que nun tien nidia la postura que va tomar l’Executivu estatal.

Dende esti momentu, yá ta abiertu un ‘Conceyu Abiertu’ nuevu. Nesta ocasión queremos conocer, a partir del debate abiertu pol artículu robláu por Alfredo Ignacio Álvarez Menéndez y los hermanos Ramón y Vital d’Andrés, cuála ye la opinión de los nuesos llectores sobre qué papel xugará la llingua asturiana nel futuru.