Los llectores d’Asturies.com, a favor de llevar el distintivu ‘AS’ na matrícula en cuenta del 'E'

Un 81 por cientu de los nuesos llectores señalaron nel ‘Conceyu Abiertu’ d'esta selmana que’l distintivu ‘AS’ debería poder llevase na matrícula. El debate sobre esta posibilidá torna a abrise tres la intención de los catalanes d’usar el ‘CAT’.
 
El Parlament catalán va discutir sobre esta opción nel mes de setiembre, dalgo qu’apoyen los nacionalistes catalanes y que nun cuenta cola oposición del PP y PSOE del país, que ponen como condición que’l ‘CAT’ nun atape la ‘E’ que lleven anguaño toles matrícules. Esta opción, que tamién defende’l PAS n’Asturies –partíu que mantién dende hai 25 años esta reivindicación–, foi apoyada pol 12 por cientu de los nuesos usuarios nel ‘Conceyu Abiertu’. Mentes, un 7 por cientu niégase dafechu a que pueda llevase’l ‘AS’ na matrícula.
 
L’apaición d’esti debate tamién coincide cola multa de 200 euros que recibió un mozu n’Uviéu, por parte de la Policía Llocalm, al llevar el distintivu ‘AS’ na matrícula. Una sanción habitual por parte de los axentes de la Guardia Civil, pero del que nun se conocía sanción dalguna impuesta por policíes municipales.
 
Otra manera, nel ‘Conceyu Abiertu’ próximu queremos conocer la opinión de los nuesos llectores sobre la reforma de la Constitución por vía urxente qu’entamaron el PSOE y el PP col apoyu d’UPN y que va aprobase esti vienres.