Los inversores van atropando camín de Bagdad

Col avance del exércitu norteamericanu pa contra la capital iraquí les bolses mundiales entamaron una serie de xubes consecutives yá dende primeros de la selmana pasada, faciéndose los inversores a la idega d'una toma norteamericana rápida de Bagdad pa trancar l'episodiu bélicu y centrase no que ye lo estrictamente económico. La toma virtual poles tropes norteamericanes d´un de los aeropuertos más importantes de Bagdad afitó sta idega y n'España l´Ibex-35 aprovechó bien esta tendencia con cuatro xubes consecutives per tercer vez esti añu. Anque la desinformación nesta guerra ye pergrande per ambos llaos, los inversores aprovecharon cualquier victoria de los Estaos Xuníos pa tomar posiciones nos valores más castigaos pola crisis xeopolítica incluso ensin esperar a que se confirmaren los datos del frente. L´Ibex algamó el vienres los 6.324,10 puntos lo que ye un 1,4% más, ganando'l nivel más altu dende xineru d´esti añu con un avance selmanal d´un 4,9%.



Los malos resultaos macroeconómicos siguieron presentes a lo llargo de la selmana siendo ya habituales les males estadístiques que s'espublicen cada ocho díes. Anque los operadores tuvieron delles duldes en toles xornaes de la selmana pasada polos malos resultaos de les empreses, l'emburrión de la guerra tornó tales duldes en compres. El datu del desemplegu nos Estaos Xunios nun-y dio munches alegries a naide, con un resultáu del 5,8% de tasa de desempleaos, y tamién les empreses tecnolóxiques siguieron estas selmana dándo-yos a los inversores males noticies.

El volume de negociu algamó'l vienres los 2.000 millones d´euros, una xuba del 11% respectu a sesiones anteriores gracies a la firme posibilidá de fusión de les tan mentaes plataformes de Vía Dixital y de Canal Satélite. Por ello Sogecable foi'l valor más beneficiáu esti vienres. Mentantu, el segundu meyor valor de la xornada foi l'asturianu Duro Felguera, con una xuba del 6,87% que punxo l'acción en 7 euros. Anque esti valor asturianu nun lu siguen los analistes por ser pequeñu, Duro ta tomando fuercia pol protagonismu na privatización de Babcock y por ser consideráu por dellos analistes como valor opable al nun tener un sociu tecnolóxicu. Nel mercáu madrilanu los valores más afectaos pol conflictu bélicu, casos d'Amadeus y NH Hoteles algamaron xubes del 2,8% y 3,8% respectivamente. El sector bancariu tamién llevó beneficiu, xubiendo'l SCH un 3,43% y el BBVA tuvo sobre'l 3%. El grupu Telefónica tamién tuvo ganancies a lo llargo de la selmana pasada, anque peor resultáu tuvieron valores defensivos como les constructores o les eléctriques con baxes ente´l 0,5% y el 3,2%. En resume l'índiz xeneral de la Bolsa de Madrid ganó un 3,06% más, asistiándose nos 656.08 puntos. Nel restu de les places europees meyoraron en xeneral los resultaos de la Bolsa de Madrid. El Dax alemán foi´l más beneficiáu con xubes penriba el 2,4%, y el selectivu de la bolsa francesa , el Cac, xubió un 1,8% más.

Otramiente, abultada cayida del petróleu hasta los 24,75 dólares, lo que supón un 3% menos que la otra selmana. El conflictu bélicu ta faciendo del mercáu de futuros sobre´l petróleu un mercáu munchu más volátil de lo que ya ye de por sí, mientres que nes divises, el dólar avanzó a la par que´l exércitu invasor en tarrén iraquino. Asina l' euru yá val 1,0715 dólares. Pela so parte, l'oru cayó hasta los 325 dólares, el preciu más baxu de va cuatru meses p'acá. Si'l trunfu de la guerra ye americanu, espérase que'l metal mariellu baxe tolo que lleva ganao dende setiembre. Refuxu con seguranza pa los inversores enantes del entamu de la guerra nun escenariu de duldes, l'oru pierde ganchu con una guerra yá terminada. P'acabar, na renta fixa los bonos siguen en cayida llibre.