Los inversores pendientes de les Elecciones nos Estaos Uníos

Anque los analistes del otru llau del Atlánticu creen que les elecciones nun van influyir muncho nes bolses, la verdá ye que les duldes sobre'l resultáu electoral tan poniendo nerviosa a la economía especulativa. De momentu l'empate técnicu ente George W. Bush y John Kerry xunta la xuba del petroleu nun son frenu pa que les bolses xuban asgaya. El pieslle del mes d'ochobre foi perbonu nos mercaos, lloñe de la lleenda prieta d'esti mes.

Selmana d'estadístiques y d'importantes datos como los d'Estaos Uníos: PIB del tercer trimestre con una medra del 3,7% mentanto que los economistes contaben col 4,3% y índiz de confianza de la Universidá de Michigan nos 91,7 puntos, meyor de lo esperao. Nel Vieyu Continente l'IPC de la Zona Euru foi del 2,5%, dos décimes más de les estimaes; el datu de confianza del consumidor d'ochobre algamó los -14 puntos mentanto que'l datu de confianza industrial foi de -2 puntos. En Francia'l datu del paru de setiembre dio'l 9,9%, dientro les previsiones. Les ventes al por menor n'España algamaron un 0,2%, mui perbaxo de lo esperao.

Pieslle en negativo'l vienres poles duldes del futuru políticu d'Estaos Uníos y pola fuercia de les xubes del petroleu. Les bolses europees tuvieron perdes perbaxo'l 2% menos Londres que peslló en positivo. Pieslle mistu al otru llau del Atlánticu con cayida del Nasdaq del 0,04% hasta los 1.974,99 puntos y xuba del Dow Jones del 0,23% hasta los 10.027,47 puntos.

Entamu del Ibex-35 del mes de payares mui cerca del máximu añal. Ochobre foi un mes de recuperanza del selectivu hasta asitiase nos 8.418,30 puntos lo que supón una xuba nel conxuntu del mes del 4,8% con un volume de negociu foi de 2.886 millones d'euros. Una de les anuncies de la selmana pasada foi la desastrosa OPV de la filial de Ferrovial Cintra, quedando l'aición de Cintra un 6% perbaxo del preciu de salida. L'anuncia de la selmana foi'l relevu na presidencia de Repsol: el ya ex-presidente Alfonso Cortina dexó-y el cargu a Antoni Brufau, qu'atropa cargos na dirección de La Caixa, Repsol, y ye tamién presidente de Gas Natural. Dempués d'esti cambéu los analistes apunten a movimientos corporativos nel sector enerxéticu afectando a la propia Repsol, Gas Natural, Endesa y a Rede Eléctrica.

Estabilidá nel mercáu de divises col euru asitiáu nos 1,2749 dólares mentanto que la llibra británica tuvo la mayor cayida dempués de l'anuncia de cayida de los precios de les cases nel Reinu Xuníu. Nel mercáu de renta fixo los bonos a diez años tamién tuvieron una cayida na so rentabilidá hasta'l 3,859% nel casu del bund alemán. El petroleu sigue tirando p'arriba pelos precios anque'l barril Brent cayó hasta los 48 dólares.