Los inversores nun s’enfoten

Anque'l preciu del petroleu frenó la xuba d'estes selmanes p'asitiase nos 36 dólares barril, la comunidá inversora internacional ta mui nerviosa énte los problemes xeopolíticos d'Iraq y Oriente Mediu. Asina, los mercaos tienen cada vegada menor volume de negociu mentanto que les bolses rexistren probetayes xubes técniques. Les posibles xubes nos tipos d'interés y les duldes sobre la estabilidá de la cotización del petroleu van marcar les próximes selmanes.

Frayos estadísticos per tol mundu: L'índiz de confianza de la Universidá de Michigan cayó hasta los 90,2 puntos cuando los analistes contaben con más de 94 puntos. Nel ámbitu de la Xunión Europea l'IPC de mayu medró un 2,5%, dos décimes más de les previstes. En Francia'l paru llegó al 9,8% y cayó 23 puntos la confianza del consumidor. L'IPC n'Italia foi del 2,3% mentanto que n'España algamó'l 3,4% mui penriba de lo esperao.

Too ello llevó a una crisis de confianza nos mercaos internacionales. Les bolses del Vieyu Continente tuvieron una selmana en negativo, con Francfort, Llondres y París en perdes penriba'l 0,5%. Al otru llau del Atlánticu Wall Street aseló nuna selmana de blincos. L'índiz Dow Jones cayó'l 0,16% hasta los 10.188,45 puntos y el tecnolóxicu Nasdaq marcó un +0,11% pa quedar en 1.986,74 puntos.

L'Ibex-35 ganó nel conxuntu de la selmana un 1,8% anque con un baxu volume de negociu de 2.045 millones d'euros, casi too de movimientos nel sector eléctricu. L'Ibex nun foi a pasar la barrera sicolóxica de los 8.000 puntos (7.951,60). Ente les xubes destaquen Gamesa, Unión Fenosa, Endesa, Sogecable y Repsol. Los valores que más perdieron foron Indra, Iberia y SCH. Terra sorprendió col repartu del so primer dividendu. Pero l'anuncia de la selmana foi la ruxidera sobre la fusión d'Endesa, Agbar y Gas Natural. Anque estes empreses dismintieron cualesquier fusión, a los inversores falto-yos tiempu pa mercar aiciones d'estes blue chips nun añu clave pal sector eléctricu.

El barril Brent peslló la selmana nos 36,03 dólares dempués de tres díes de cayíes énte les anuncies de medra na producción. Pero'l casu ye que sigue'l debate dientro de la OPEP. Dellos rumores apunten a que na próxima reunión los países productores van suspender el sistema de cuotes de producción y da-y llibertá a cada país pa marcar la producción que quiera. Les bolses tan sollertes a estos movimientos ya que'l riesgu d'inflación ye una realidá como indiquen les estadístiques de precios. La ocupación n'Iraq y la política d'Israel nun ayuden nuna zona onde cada vegada ye más complicada la esportación de petroleu.

Muncha volatilidá nos mercaos, especialmente nos mercaos de divises y renta fixo. Nel primeru, l'euru sigue lluchando por caltener la cotización contra un dólar que lleva yá delles selmanes garrando muncha fuercia. Al final la divisa europea asitióse nos 1,22 dólares unidá. A lo llargo de la selmana los bonos tuvieron munchos blincos. Asina'l bonu de referencia'l bund alemán terminó con una rentabilidá del 4,322%. La pública foi de más a menos pola volatilidá de les bolses.