Los inversores inflen les Bolses

Nes últimes selmanes d'esti añu la comunidá inversora ta metiendo munches perres nos mercaos de renta variable. L'oxetivu de pesllar un de los meyores exercicios de los últimos años ta animando bien a los inversores, tanto a los grandes como a los pequeños. El rally de xubes pa despidir el 2004 ya entamó como bien diz les xubes consecutives y la medra del volume de negociu contratáu nos mercaos.

Les estadístiques centráronse nos Estaos Xuníos. El permalu datu de desempléu foi'l que tiró p'abaxo de dellos mercaos bursátiles al mesmo tiempu qu'afogaba la cotización del dólar. La economía norteamericana solo creó 112.000 nuevos puestos de trabayu algamando una tasa de desempléu del 5,4%. Los economistes esperaben al menos 200.000 nuevos puestos de trabayu, asina como nueves anuncies d'una esperada y rápida recuperanza económica. La Reserva Federal nun ve claro una nueva xuba nos tipos d'interés ante les febles estadístiques llaborales.

Xubes nes bolses de Wall Street anque les estadístiques económiques nun pintaren tan bien. L'índiz Dow Jones con una probetaya xuba del 0,07% algamó los 10.592,21 puntos mentanto que'l tecnolóxicu Nasdaq medró un 0,20% pesllando nos 2.147,96 puntos. Nel Vieyu Continente les principales tuvieron una selmana de más a menos. Los índices de París y Francfort foron los que más baxaron a la contra que la bolsa londinense que nel últimu momentu escapó de les perdes.

Con un Ibex tocando los 8.800 la Bolsa de Madrid ya ta preparando la folixa pa pesllar el meyor exerciciu nos últimos tres años. Anque tovía los inversores esperen más xubes y más máximos añales los brokers ven cumplíes con estos niveles les espectatives puestes nesti añu 2004. El volume de negociu de 2.657 millones d'euros ye un de los más altos de les últimes selmanes. L'Ibex-35 ta asitiao nos 8.787,90 puntos, con una xuba selmanal del 0,55%. Ente los valores con meyor pieslle positivu tan Amadeus, Iberia y Ercros. Nel terrén de les perdes destacaron Arcelor, Altadis, Rede Eléctrica y BBVA. Esti últimu ta metíu nun terrén bien espinosu como ye l'intentu del Gobiernu de poner un nuevu presidente na entidá bancaria. El caballu blanco ye la constructora Sacyr Vallehermoso que ta a la gueta d'entrar nel conseyu d'alministración del BBVA con una participación del 3%. El presidente del BBVA, Francisco González (FG), ya tien la maquinaria a puntu pa resistir l'asediu gracies al control indireutu del 10% del capital de pequeños grandes aicionistes más un 30% de fondos institucionales que tan mui contentos cola xestión del tovía presidente.

Reaxuste técnicu nel mercáu enerxéticu onde'l preciu del barril Brent cayó hasta los 39,73 dólares. Les perimportantes xubes de los últimos meses ya tan dando vértigu a les cotizaciones que ya entamaron a baxar poco a poco. La xuba de les reserves enerxétiques nos Estaos Xuníos ye una de les razones de la moderación de precios del oru prieto. Otramiente, l'oru blanco si que ta viviendo un verdaderu rally de xubes algamando ya una cotización de 451 dólares por onza. El metal amariello nun valió tanto nos últimos quince años. Los brokers especializaos nesti mercáu alvierten de la perimportante sobrevaloración del oru col altu riesgu de que tenga una brusca cayida si hai recuperación na cotización del dólar. El preciu oxetivu de la onza d'oru según los espertos ye de 350 dólares, un valor cada vegada más lloñe del que se cotiza nos mercaos.

Otru máximu del euru que paez que nun tien frenu. La divisa europea ya tien un cambiu col dólar nel 1,34 dólares unidá, dalgo ensin duldes históricu. Los analistes venlo claro y apunten a una cotización del euru penriba'l 1,40 mentanto siga asina la fuerte apueste inversora na divisa europea. La divisa norteamericana nun ye quien a dixerir les males anuncies macroeconómicos como tampoco presta l'esaxeráu déficit públicu d'Estaos Xuníos. La debilidá del dólar de momentu nun va permitir al Bancu Central Européu (BCE) xubir los tipos d'interés na Zona Euru a curtiu plazu. Nel mercáu de renta fixo los bonos d'Alemaña a diez años tuvieron una cayida na so rentabilidá hasta'l 3,732%.