Los interinos van entamar una fuelga indefinía a partir del llunes contra los despidos polos recortes nel sector

Los 2.000 profesores interinos asturianos van entamar una fuelga indefinía pola situación na que s’alcuentren polos recortes previstos na educación pública. Tamién van aniciar una acampada frente a la Delegación del Gobiernu estatal.
 
L’Asamblea de Profesoráu Interín n’Asturies tomó esta selmana esta decisión, que tien el sofitu de SUATEA, tres l’aprobación del decretu llei “de midíes urxentes de racionalización del gastu públicu nel ámbitu educativu” aprobáu pol Congresu’l 17 de mayu que, n’opinión de los interinos asturianos, “va suponer el despidu de miles de docentes interinos en tol Estáu, lo que provocará’l deterioru de la calidá del sistema públicu d’enseñu y nos retrotraerá a un escenariu que paecía superáu”. A ello hai que sumar les midíes yá anunciaes pola conseyera nueva del ramu, Ana González, como l’aumentu de la ratio n’Infantil de 3 años y del horariu llectivu de los profesores de Secundaria: “Supondrá’l despidu de cientos d’interinos y la imposibilidá pa éstos de volver a trabayar na educación pública”, afirmen los docentes.
 
Estes decisiones polítiques lleven a los interinos a convocar la fuelga indefinía dende’l llunes, asina como una acampada n’Uviéu a partir de les 9 hores nel mesmu llugar onde tán acampaos, a turnos, trabayadores de la minería. Con esta protesta pretenden presionar al Gobiernu del país pa “que nun aplique la política de recortes na educación pública y que nun se produzan despidos de profesoráu interín; nun aumente la ratio en nengún nivel educativu y se revoquen les instrucciones relatives a los grupos d’Infantil de 3 años; que se cubran con normalidá les sustituciones; que se defenda la escuela rural y la ufierta de Bachilleratu y FP; que nun se proceda a empeorar les condiciones llaborales del profesoráu; que se garantice’l cumplimientu de los alcuerdos en materia de plantiyes docentes; que se mantengan los horarios actuales, asina como la ufierta educativa; y que se rescindan los conciertos firmaos nesti cursu”.
 
Tres esta decisión de l’Asamblea de Profesoráu Interín n’Asturies, trés van ser los sectores en fuelga indefinía nel país: los mineros, los tresportistes y los interinos. Una situación complicada que nun paez que vaya tener solución a plazu curtiu.