Los indignaos salen a la cai esti domingu pa protestar “contra los ataques del capital”

|

Xixón va acoyer esti domingu una protesta del movimientu 15-M, qu’esti xueves cumplió un añu de vida. ‘Contra los ataques del capital, llucha y solidaridá’ ye’l lema de la manifestación que va salir a les 17 hores de L’Humedal.
 
Según informen dende’l 15-M Asturies, la movilización respuende a "les agresiones a los derechos sociales y llaborales" d’unes reformes impulsaes pol Gobierno que "van dirixíes a aumentar el poder de los grandes empresarios y la banca". Por ello, llamen a la ciudadanía a tomar otra vuelta la cai pa qu’amuese la so disconformidá ante lo que los indignaos consideren un ataque del capital.
 
Esta manifestación coincide cola campaña eleutoral que ta desarrollándose nel país. Tamién n’Andalucía, que celebra eleiciones na mesma xornada que n’Asturies, tán convocaes protestes en delles capitales, nesti casu baxo’l lema ‘Recortes para los mercados, soberanía para el pueblo’. Hai que destacar qu’esti xueves pasáu cumplióse un añu del nacimientu del movimientu 15-M, una corriente de protesta que sacó a la cai a millones de persones en tol Estáu y qu’espardióse a otres zones del planeta.

Contador Estadistiques