Los indignaos d’Avilés tornen a acampar en solidaridá colos sos compañeros de Madrid

Na asamblea celebrada esti miércoles, los indignaos d’Avilés decidieron volver a acampar na Plaza de la Casa Conceyu al menos hasta’l domingu. D’esta forma quieren mostrar la so solidaridá colos sos compañeros de Madrid.
 
A les seis de la mañana del martes, 200 policíes principiaron a desallugar a los pocos indignaos que permanecíen na Puerta del Sol y nel Paseo del Prado de la capital castellana nuna operación ensin incidentes pero que tuvo una respuesta rápida pol movimientu d’indignaos. Nesa mesma xornada, miles de persones salieron otra vuelta a la cai a protestar pola decisión de la Delegación de Gobiernu y la Comunidad de Madrid, que venceyen a la visita próxima del Papa. Nes manifestaciones, onde sí hubo intervención policial, reclamen el so derechu a tornar al sitiu que foi xerme del movimientu 15-M. Nestos momentos, la Policía mantién acordonada la Puerta del Sol pa que nun pueda acceder nengún manifestante a ella.
 
Los indignaos avilesinos, en solidaridá cola situación que tán viviendo los sos compañeros madrilanos, decidieron ayeri volver a acampar na Plaza de la Casa Conceyu hasta’l domingu. Nun comunicáu señalen que’l desallugu de Sol foi “una maniobra sucia” al facese de madrugada y n’agostu, y condenen “l’actuación policial y les órdenes del gobiernu” qu’impiden “la llibre circulación de persones”. “Madrid nun ta sola y queremos que sepan que tornaremos cada día”, anunciaron los indignaos, que tienen programaes charres pa esta fin de selmana y una concentración nel puntu d’acampada’l domingu a les 20 hores.