Los indignaos asturianos van sumase’l sábadu en Mieres a la xornada global de protesta

Coincidiendo cola llegada de les marches indignaes a Bruseles, esti sábadu va celebrase una xornada global de protesta en más de 600 ciudaes de 60 estaos. Mieres va acoyer la manifestación asturiana y delles actividaes alredor d’ella.
 
La marcha peles cais de Mieres, baxo’l lema ‘Xuníos por un cambiu global’, va tener salida a les 17.30 hores de la estación de buses, pa terminar nel parque Xovellanos. D’esta forma, Asturies súmase a la iniciativa entamada pol movimientu 15-M a nivel global que pretende movilizar a millones de persones de tol planeta “en protesta contra los mercaos financieros, la banca mundial y la clase política internacional”. Bruseles va ser l’epicentru de la indignación mundial con una manifestación multitudinaria, con salida a les 13.30 hores de la Estación del Norte, coincidiendo cola llegada a la capital belga de les marches procedentes del Estáu español, Alemaña, Holanda y otros puntos d’Europa. La movilización va terminar na plaza Robert Schuman, onde tán les sedes de la Comisión Europea y del Conseyu de la Xunión Europea.
 
L’actividá en Mieres nun va quedar namái na manifestación, yá que tán previstos dellos eventos a lo llargo del día. Asina, a les 13.30 hores, va celebrase nel parque Xovellanos una xinta popular amenizada polos malabares del grupu Desperteyu, de La Pola Siero, y por cuentacuentos infantiles. Yá de tarde, tres la marcha de protesta peles cais de la ciudá, tán previstes les actuaciones nesi mesmu parque d’Alfredo González, K-Nalón, Raíces del Sonkoy y Eloy, actu que va tar presentáu pol monologuista Carlos Alba ‘Cellero’.