Los independentistes flamencos colen del diálogu pa formar Gobiernu

Los nacionalistes conservadores del partíu Nueva Alianza Flamenca (N-VA) abandonaron el diálogu abiertu con otros seis partíos políticos belgues pa buscar un consensu ente flamencos y valones sobre la reforma del Estáu.

"Hai que poner los contadores a cero", dixo en rueda prensa'l líder de N-VA, Bart de Wever, acabante declarar que l'últimu intentu p'averar postures "nun foi efectivu", y alvirtió qu'estes negociaciones llegaron "al so fin" y que ye necesario "empezar dende cero".
  
De Wever llogró una victoria histórica nes elecciones antemanaes del pasáu 13 de xunu, al llograr que'l so partíu fuera la fuerza más votada en Bélxica y ocupar una quinta parte de la Cámara.
  
Dende entós l’Estáu ta dirixíu por un Executivu en funciones, el del democristianu Yves Leterme, que, amás, ocupa la presidencia de vez de la UE; mientres, negóciase una fonda reforma d'Estáu que dea más competencies a les dos comunidaes nacionales, que ye lo reclamáu polos flamencos (comunidá nacional norte del Estáu), pero pero refugáu polos valones (sur).


Crítiques de los socialistes  
Pa los socialistes valones, segunda fuerza nes elecciones (el so líder, Elio di Rupo, tamién trató sin ésitu de negociar un acuerdu pa formar Gobiernu), la decisión anunciada esti llunes por De Wever ye una reacción "irresponsable y dañible" pal Estáu.
  
La principal dificultá pal consensu ta nel nuevu modelu de financiación pa la rexón capital de Bruxeles, y na separación del distritu electoral de Bruxeles-Tope-Vilvoorde.