Los guilandeiros d'Allande en semeyes

Asturies.com ufierta güei una galería de semeyes del Alcuentru de Guilandeiros que se celebró'l fin de selmana pasáu nel conceyu d'Allande. Músicos, xente de toa condición, y sobre too los personaxes del aguilandu allandés percorrieron les parroquies d'esti conceyu del suroccidente asturianu.

La Puela d'Allande acoyó l'últimu fin de selmana'l I Alcuentru de Guilandeiros n'Allande.una fiesta tradicionalmente venceyada col ciclu de la navidá pero que de va un tiempu p'acá treslladó la so celebración al mes de febreru, allegándose al antroxu. Les actividaes d'esti alcuentru entamaron el sábadu de tarde, cuando nel Cafe Centro, atacáu de xente, l'investigador Naciu I Riguilón presentó'l llibru "L'Aguinaldu nel suroccidente d'Asturias". Na presentación, l'autor agradeció primero de nada la collaboración a los informantes por apurrir la información necesario pa ellaborar esti llibru, información que sirve pa qu'agora puedan volver a facese estos aguilandos peles caleyes y pueblos d'Allande, onde llevaben más de 50 años ensin celebrase. Tamién se presentó otra obra del autor esa mesma tarde, esta vegada un estoyu de cuentos de la propia güela del autor. Esti llibru incluye una trescripción de los cuentos y un cd colos cuentos contaos pola propia informante. Tres la presentación d'estos dos llibros, dambos editaos por CH Editorial, vieno la hora de la música cola actuación de Felpeyu nel Cafe Centro, que supunxo el puntu d'arranque pal ruxidoiru onde un montonáu de músicos animaron la nueche hasta bien tarde.

Al día siguiente celebrábase l'actividá principal d'estos Alcuentros, un aguinaldu que diba visitar dellos pueblos de les parroquies allandeses. A eso de les 11 la mañana xuntáronse na plaza de la Puela los personaxes y músicos qu'esi añu diben facer revivir l'aguilandu, como se fai dende 1998 gracies al trabayu de l'Asociación de muyeres Rio Nisón. Ellí nun faltaron los personaxes principales, el noviu y la novia, que representaron con un cambiu de sexu "caseru" Lisardo Lombardía (Novia) y Celia González (Noviu). Acompañando a estos dos personaxes nel día de la so boda, qu'acabo incluso col partu de la novia, diben el restu de los personaxes tradicionales del Aguilandu d'Allande; el Médicu que va dando la "melecina" necesaria pa que nun falten fuercies, el Santeiru con barba y vestíu de blancu llevando en cuellu un recién nacíu, el Padrín , la Madrina, la Frasca, el Diablu, el Carraqueiru, la Gitana, el Soldáu, los Xamascones....etc. Pa que los personaxes puedan facer bien la comedia nes cases a les que vaigan nun ha faltar la música, y d'ello encargáronse varios músicos, ente los que taben dellos miembros de Felpeyu que se revistieron pa participar nel Aguilandu.

Les semeyes que se pueden ver na galería de semeyes correspuenden al pasu del aguilandu peles cases de Zreizeda (Allande), y son cortesía del músicu de La Bandina David Varela. Ellí, como ye norma, los Xamascones pidieron l'Aguilandu nes cases, mientres los personaxes facíen la comedia colos músicos amestando la banda sonora al espectáculu teatral. Les cases dieron pa l'aguilandu como ye costume, y amás de dalguna perruca, nun faltó dalgo de llicor, chorizu, vinu, l.linguaniza y rosquielles. Les perres que s'atropen nel camín xúntense toes pa facer más p'alantre una fiesta onde se convida a tol mundu que participó nel Aguilandu.

Pa saber más sobre esti tradición asturiana Asturies.com convida a la llectura del llibru de Naciu'i Riguilón "L'Aguilandu nel Suroccidente d'Asturias". El llibru desplica, amás del d'Allande, les característiques de los aguilandos de Cangas, Somiedu y Tinéu, acompañándolo too con material fotográficu abondo.