Los grupos parlamentarios de PSOE y IX-BA apauten una parón pa la incineradora de Serín

Los grupos parlamentarios de PSOE y Izquierda Xunida - Bloque por Asturies roblaron ayeri un alcuerdu parlamentariu pol que van mandase énte l'Ente de xestión de residuos d'Asturies, COGERSA, pa qu'investigue toles posibles alternatives a la construcción de la incineradora de basura de Serín, un proyectu que tien un presupuestu de cerca de 200 millones d'euros y que tien en contra a asociaciones de vecinos, movimientos ecoloxistes, partíos políticos y plenos de conceyos enteros, casu de Carreño.

La incineradora, un proyectu que Cogersa yá tenía aprobao facer nel añu 2003, ta criando un debate social y una oposición a tolos niveles qu'encamienten aparcar pel momentu'l proyectu. La propuesta de los grupos parlamentarios de PSOE y IX-BA fala de "cualquier decisión que se garre sía frutu d'un gran consensu". L'anuncia d'esta propuesta vieno dempués de que'l grupu del PP anunciare la presentación d'una cuestión en Parlamentu na qu'entrugaba pol posicionamientu del executivu nel tema de la incineradora, una entruga que podía derivar en moción que tendría de votase na cámara.

La presentación de que como mínimo va retrasar pel momentu la construcción de la incineradora, diose'l mesmu día en que se presentó la plataforma "Conceyu contra la Incineración" na que tán presentes venti grupos ente asociaciones de vecinos, grupos ecoloxistes y partíos políticos. Los ecoloxistes Paco Ramos, d'Ecoloxistes n'Acción, y Fructuoso Pontigo, de la Coordinadora Ecoloxista d'Asturies, ficieron de portavoces del conceyu, nel que tamién tan el Colectivu Ecoloxista d'Avilés, Kollectivu X, Jóvenes por la Ecología, Los Verdes, Green, Colectivu Ecoloxista La Llavandera y Jóvenes verdes, los partíos políticos Izquierda Xunida, Izquierda Asturiana, Andecha Astur, Lliberación, UICA - Carreño y Bloque por Asturies, los sindicatos CGT y CSI, Plataforma pola Defensa del Patrimoniu Cultural de Corvera d'Asturies, la Unión de Consumidores, la Federación d'Asociaciones de Vecinos de Llanera y l'Asociación de Vecinos Xuníos de Los Campos - Corvera, Conseyu de la Mocedá d´Uviéu.