Los ganaderos reparten 3.000 llitros de lleche n'Uviéu

Los ganaderos asturianos repartieron ayeri de baldre n'Uviéu 3.000 llitros de lleche en protesta pola baxada de precios que ta imponiéndo-yos la industria llechero. La esixencia d'una normativa qu'esclarie la composición y característiques que tienen de tener los postres derivaos del lleche ye otra de les reivindicaciones d'una protesta que se fizo en Paséu Los Álamos d'Uviéu a les 12 convocada polos tres sindicatos del campu, ASAJA COAG y UCA..

La baxada del preciu que cobren los ganaderos pol lleche, que según les organizaciones sindicales ta ente los cuatro y seyes céntimos de va unos meses p'acá hasta ponese en 27 céntimos. L'otru pegoyu de la protesta, que quieren que marque un reblagu na campaña reivindicativa, ta nel tema de los postres derivaos de lleche, unos productos que nun tan controlaos y que polo tanto puen llevar un tanto por cientu desconocíu de lleche en polvo o d'agua. Esti asuntu xeneró bien de polémica va un mes en Cataluña, onde los ganaderos y la Generalitat enfrentáronse cola empresa Pascual nuna batalla llegal y de boicots qu'acabó en recursu de la Generalitat.

La tema que ta tres de dambes reclamaciones ye la producción y comerciu del lleche prieto, un lleche que se produz fuera de la cuota que marcquen les autoridaes y que ta estragando'l mercáu a precios bien perbaxo del que tien el lleche que se fai dientro de cuota y, que en consecuencia, ta tirando p'abaxo pol preciu del lleche. Los sindicatos denuncien que les grandes empreses tan mercando lleche prieto col preste implícitu de les alministraciones, que nun tan controlando esta situación. Por ello, el lleche que se repartió ayeri a mediudía en Paséu de Los Álamos foi lleche llegal dafechu.