Los Gaiteros d’Aragón, Premiu de Folclor “Martínez Torner”

La Conceyalía d'Educación d'Uviéu ta acabante de facer públicu'l fallu de la primera edición del premiu Nacional de Folclor "Eduardo Martínez Torner". El premiu, que pretende reconocer el trabayu de los que desarrollen dalgún tipu d'investigación nos campos del folclor y la cultura tradicional, foi pa la "Asociación de Gaiteros de Aragón". El xuráu emponderó l'esfuerzu d'esta formación na recuperación de les tradiciones populares, llabor que s'espeya "nun gran númberu de publicaciones". La entrega del premiu va facese'l 23 de febreru nun actu que va tener llugar nel Auditoriu Príncipe Felipe d'Uviéu.

L'Asociación "Gaiteros de Aragón" esiste dende 1989. Constituyida como asociación cultural, tien ente los sos oxetivos la investigación y espardimientu de la cultura tradicional aragonesa, sobremanera no tocante a la música en toles sos estayes, dende la recuperación del repertoriu a la de los instrumentos. Precisamente ún de los instrumentos más importantes del folclor d'Aragón ye la gaita, un instrumentu que tuvo nun tris de desapaecer y que namás aguantó nel altu Aragón, onde'l llabor de los más de 300 miembros de l'asociación rescató la gaita aragonesa de la so sustitución pola gallega, modelu que munchos grupos folclóricos adoptaron dende mediaos del sieglu XX al francer la tradición de construcción de gaites del país.

Anguaño, y dempués de 15 años de llabor, la gaita aragonesa ye una realidá que vuelve a puyar con fuerza nel panorama musical aragonés, saliendo tamién fuera del contestu folclóricu tradicional pa convertise nun de los instrumentos de grupos como "La Orquestina del Fabirol" o "La Ronda de Boltaña". Pal públicu asturianu, la gaita aragonesa ye un instrumentu raru enforma. Como gaita más mediterránea qu'atlántica que ye, los sos roncones nun apunten p'arriba, y asina'l roncón principal va nuna posición más bien horizontal mientres qu'un segundu roncón que tien esti instrumentu apunta dafechu pal suelu y va paralelu al equivalente al punteru de la nuestra gaita. Sicasí, la diferencia morfolóxica más evidente ente les dos gaites ye'l tamañu del fuelle, muncho más grande n'aragonesa y qu'obliga a tocala nuna posición mui distinta. D'otra manera, la gaita aragonesa suel llamar l'atención polos vistíos de tela de munchos colores, bordaos y con volantes que lleva pa tapar el fuelle. Una lleenda aragonesa diz qu'ello vien de cuando un antiguu gaiteru vistiere l'instrumentu cola ropa de la so fía muerta, pasando entós a convertise en tradición el vistir la gaita como si fuere una neña

Más información na web Arafolk