Los ex trabayadores de Venturo XXI indígnense pola dimisión de Marroquín

Los ex trabayadores de Venturo XXI manifestaron esti llunes "sorpresa ya indignación" ante la dimisión del director de Idepa, SRP y Conseyeru de Venturo XXI, Víctor González Marroquín.

Los ex trabayadores sostienen que cuando ta a puntu de cumplise un añu de tomar de decisión del conseyu d'alministración de la empresa de solicitar el concursu voluntariu d'acreedores, que ta a puntu de llevar a la lliquidación de la mesma y que yá dexó na cai a casi 70 trabayadores, "vese como los mayores responsables del fracasu" d'esti proyectu emblema de la reconversión industrial na cuenca del Nalón siguen "desapaeciendo" ensin atopar una solución y evitando cualquier responsabilidá.
  
El colectivu recuerda que la causa del inminente zarru de Venturo XXI foi la "pésima" xestión de la mesma y que "fueron esti xestores los que nun supieron o queríu defender el so propiu proyectu en momentos de dificultá".
  
Según los ex trabayadores de Venturo XXI primeru fueron los hermanos Coronado Piñana, empresarios privaos propietarios del 51 per cientu de la empresa, los que delegaron nos sos abogaos toa responsabilidá mientres el procesu concursal, y agora la dimisión de Marroquín que representaba'l 21 per cientu que tenía la SRP, "por non falar del cuartu miembru que representaba'l restu del accionariado propiedá de Sadim Inversiones y Sodeco, Manuel Fernández Prada, del qu'enxamás se tuvo conocencia dalguna".
  
“Cúmulu de despropósitos”
Poro, consideren que les palabres de Marroquín, son un “cúmulu de despropósitos, fuera de sitiu, si tener en cuenta que como conseyeru de Venturo XXI ye responsable de la xestión y del intentu nulu de reflotar la empresa; y nun contribúin pa nada a la busca d'actividá en diches instalaciones".