Los ex - presidentes asturianos apuesten pola reforma del Estatutu pa qu’Asturies "nun quede al marxe"

Los ex presidentes del Gobiernu asturianu Pedro de Silva, Juan Luis Rodríguez-Vigil y Sergio Marqués Fernández participaron ayeri nun actu institucional con motivu de la celebración de los 25 años de l'estatutu d'autonomía asturianu.

Nel actu, en que la Xunta Xeneral del Principáu convidó a tolos diputaos que formaron parte del parlamentu asturianu en dalguna de les llexislatures dende 1981 a l'actualidá.

Pedro de Silva, primer presidente de l'actual autonomía asturiana y qu'exerció'l cargu dende 1983 a 1991 afirmó que la revisión de los estatutos vien marcada poles reformes xenerales, polo que concluyó que si toles autonomíes reformen los sos estatutos y Asturies nun lo fai, ello supondría una "singularidá negativa".

Sergio Marqués, presidente ente los años 1995 y 1999 sorrayó qu'Asturies tien de reformar el so estatutu porque too se mueve y l'estatutu nun pue quedar al marxe. El que fuera primer presidente asturianu pol PP y actualmente líder d'Unión Asturianista afirmó que "Asturies nun pue aceptar una situación competencial inferior a la d'otres comunidaes y los asturianos tampoco puen almitir que se-yos impongan situaciones que se negociaron con otres autonomíes, casu de Cataluña o'l País Vascu.

Pela so parte, el que fuera presidente del Principáu ente 1991 y 1993, Juan Luis Rodríguez-Vigil, afirmó que la reforma estatutaria depende en gran midida de "lo que s'estime adecuao políticamente" y recordó que, a lo llargo d'estos 25 años la rexón "pudo facer delles operaciones d'autogobiernu significatives y singulares".



A lo llargo de las seis llexislatures que se lleven dedemocracia más la primer llexislatura provisional, la Xunta Xeneral del Principáu tuvo 163 diputaos y namás 40 diputaes, celebrando 780 plenos y aprobando 202 lleis.