Los estudiantes universitarios van poder facer práutiques na organización Iniciativa pol Asturianu

|

Un conveniu de Cooperación Educativa robláu pola Universidá d’Uviéu y Iniciativa pol Asturianu va permitir a los estudiantes universitarios facer práutiques nesti coleutivu. La organización busca persones de tolos perfiles académicos.

Luis J. Rodríguez Muñiz, vicerrector d’Estudiantes de la Universidá d’Uviéu, y Inaciu Galán, presidente d’Iniciativa pol Asturianu, firmaron recién esti conveniu de duración indefinida que tien como oxetivu “fomentar la formación práutica de los estudiantes de la Universidá d'Uviéu n'Iniciativa pol Asturianu”. Asina, esti coleutivu busca contar “cola collaboración d'alumnos de la Universidá d'Uviéu, al mesmu tiempu que-yos ufre una granible esperiencia nel campu de la xestión de la  reivindicación llingüística”.

Les práutiques tán abiertes a persones de cualquier perfil académicu qu s’impliquen nes xeres distintes que se desendolquen en caúna de les estayes de la organización: alministración, prensa, ayalguería, rellaciones  internacionales, empresa, etc. Les persones interesaes pueden ponese en contautu con Iniciativa pol Asturianu al traviés del corréu electrónicu contautu@iniciativapolasturianu.org, na so web o en redes sociales. Otra manera, esti coleutivu anuncia que ta dispuestu a roblar convenios asemeyaos p’acoyer a alumnos que provengan d'otres universidaes o centros de formación profesional.

 

Contador Estadistiques