Los estudiantes universitarios refuguen el nomamientu de Castro como presidenta del Conseyu Social

El Conseyu d’Estudiantes de la Universidá d’Uviéu criticó’l nomamientu d’Alicia Castro Masaveu como presidenta del Conseyu Social de la institución. Tamién amosó’l so refugu a la composición definitiva del órganu.

Según espliquen nun comunicáu, la toma de posesión del cargu por parte de la ex diputada popular ye “un indicador preocupante –tan negativu como revelador– de los planes esistentes pa la universidá pública asturiana”. “Albidramos evidente que la eleición d'Alicia Castro Masaveu respuende a la tendencia mercantilizadora que la Universidá vien sufriendo dende va años, ya interpretamos el so nomamientu como un claru reblagu alantre nestes polítiques, definíes na Estratexa Universidá 2015, y peles que se propón venceyar el conocimientu académicu a la productividá económica qu'esti pueda xenerar”, afirmen los estudiantes.

La composición del Conseyu Social, “cola incorporación de Duro Felguera, el Grupo Masaveu, la Caxa Rural d’Asturies y el Patronatu de la Fundación Príncipe d’Asturies pente medies del procedimientu de llibre designación per parte del nuevu Gobiernu del Principáu d'Asturies”, tampoco presta al Conseyu d’Estudiantes, que valora estes entraes al estamentu cimeru de representación univesitaria como “la confirmación efeutiva d'una tendencia privatizadora que camentamos alarmante dafechu na nuestra universidá pública y nun órganu que tien ente les sos competencies aspeutos tan importantes pal alumnáu como'l Réxime de Progresu y Permanencia o los nuevos planes docentes de cada titulación”.

D’igual forma, los estudiantes recuerden l'ausencia “de coleutivos de calter social, públicu y tresversal” nun Conseyu que ta “lloñe de cumplir coles sos finalidaes estatutuaries”, polo que’l Conseyu d’Estudiantes de la Universidá Uviéu “posiciónase contrariu a la so esistencia”.