Los espertos defenden el Sidrón como'l meyor yacimientu de la península de neandertahles

La Conseyera de Cultura Ana Rosa Migoya y el Director xeneral de Promoción Cultural Carlos Madera presentaron ayeri xunta l'equipu d'historiadores y arqueólogos que van encargase de la escavación, encabezaos pol caderalgu Javier Fortea, la campaña de trabayos nel yacimientu del Sidrón, nel conceyu Piloña. Los arqueólogos sorrayaron la importancia d'El Sidrón como'l yacimientu neanderthal más importante de tola península y emponderaron la novedá y la calidá de los medios técnicos que van emplegase nos llabores de la campaña, que va desarrollase dende setiembre d'esti añu al 2006 con un presupuestu de más de mediu millón d'euros.

L'equipu d'arqueólogos, historiadores y paleoantropólogos encabezáu por Javier Fortea apurrió interesantes datos sobre les primeres campañes d'investigación n'El Sidrón. Asina, l'especialista del Muséu Nacional de Ciencies Naturales Antonio Rosas esplicó que'l Sidrón yera'l "meyor yacimientu de neanderthales de tola península ibérica, una impresión que'l profesor de la Universidá d'Uviéu Marco de la Rasilla confirmó colos datos cronolóxicos sacaos de los güesos del Sidrón, que falen d'una antigüedá de cerca de 40.000 años. Como apuntó'l caderalgu Javier Fortea, ello confirmaría la esistencia n'Asturies d'una comunidá de neanderthales mui seronda nuna dómina en que l'homo sapiens entama a tener presencia nesti mesmu paisaxe, lo que-y daría más interés entovía al yacimientu.

Antonio Rosas centróse tamién n'otru puntu que primero yá esplicare pormenorizadamente marco de la Rasilla falando de la datación de los güesos, y ye que nel Sidrón tan emplegándose técniques d'investigación nueves dafechu que faen del trabayu nel yacimientu asturianu una referencia na investigación europea del momentu. Marco de la Rasilla esplicó que sobre les mesmes pieces taben aplicándose mediciones pol sistema tradicional del Carbonu-14 y tamién prebes d'identificación d'aminoácidos, resonancies d'electrospin y dataciones pel sistema d'uraniu-toriu. Pela so parte, Rosas sorrayó'l papel de la técnica d'estracción del ADN de los güesos, que permite saber que tipu d'homínidu ye'l del Sidrón, conocer les pautes de cambéu del ADN dientro de la evolución del neanderthal y apautar tamién la variabilidá cronolóxica y espacial de la especie.

Sobre los restos analizaos hasta agora, los arqueólogos quixeron ser prudentes y esplicaron que, en sabiéndose daqué que seya de relevancia, les publicaciones científiques d'ámbitu internacional tienen acutada la preferencia. Con too y con ello, Antonio Rosas esplicó que, hasta agora, l'equipu investigador tien identificaos cinco exemplares de neanderthal más o menos enteros, dándose la circunstancia de qu'ente ellos hai, amás d'un neñu de 6-7 años y dos exemplares adultos, otros dos son adolescentes, con una edá d'ente 11-13 años. Ello tien un interés enorme en cuantes que l'adolescencia y los sos cambeos físicos son una ventaya evolutiva que nun se sabe hasta que puntu taba desarrollada nel neanderthal.