Selmana de les Lletres Asturianes

Los escritores reivindiquen la dignidá de la llingua y del oficiu nos Premios 2015

|
Los escritores reivindiquen la dignidá de la llingua y del oficiu nos Premios 2015

El patiu de columnes del Palaciu Conde de Toreno n'Uviéu acoyó'l vienres 29 de xineru l'actu d'entrega de los cinco premios lliterarios que la Conseyería d'Educación y Cultura convoca anualmente col fin d'afitar la llingua asturiana como vehículu d'espresión lliteraria de primer orde.

Nel actu, presidíu pol conseyeru d'Educación y Cultura, Genaro Alonso Megido, tdiose a los gallardonaos l'Árbol de les lletres, una pieza artística esclusiva otorgada en reconocimientu a la calidá de les obres premiaes.

Nel actu tuvo representada l’Academia de la Llingua a través de Roberto González Quevedo y cuntó cola presencia de la directora xeneral d'universidaes Cristina Valdés.

Amás tamién se dexaron ver delles persones de representatives de la política y la cultura asturiana, dende l’alcalde de Cabranes, al conceyal de cultura d'Uviéu, Roberto Sánchez Ramos, "Rivi", pasando pel portavoz de Podemos na Xunta Xeneral, Emilio León.

Dellos de los premiaos, como Vicente García-Oliva y Antón García, nun dexaron pasar la ocasión pa reclamar la oficialidá del asturianu y pa rescamplar la situación de los escritores en llingua asturiana, que nun pueden optar a los premios nacionales de lliteratura.

Los ganadores foron: 

  • Premiu Xosefa Xovellanos de novela (36º edición): El premiu recayó nel escritor Francisco Álvarez pola so novela Lluvia d’agostu na que'l xuráu destacó “la estructura, la trama y desenllaz narrativu qu'inducen a la llectura continua de la obra, xuntu col manexu de fontes d'información y documentación qu'aporten verosimilitú a la historia narrada”.
  • Premiu Xuan María Acebal de poesía (21º edición): L'escritor Antón García ganó esti premiu pola so obra Ferralla na que s'aborda un tópicu poéticu como'l de la muerte usando una estructura orixinal, de gran fuerza espresiva y con referencies cultes y populares perfectamente engarzaes”.
  • Premiu Máximu Fuertes Acevedo d'ensayu (21º edición): El premiu recayó nel escritor José Ángel Gayol pola so obra Vértigu. L’atracción del abismu na sociedá contemporanea, presentáu pol so planteamientu modernu, la so estructura novedosa y l'harmonización de narración y xéneru ensayísticu con un llinguaxe áxil”.
  • Premiu María Josefa Canellada de lliteratura infantil y xuvenil (8º edición): L'escritor Vicente García Oliva resultó ganador de la octava edición del premiu María Josefa Canellada por Fontenebrosa III: el final al destacar “l'habilidá cola que se constrúi un universu míticu y máxicu a partir del ritmu narrativu y la caracterización de los personaxes”.
  • Premiu Alfonso Iglesias de cómic (7º edición): El músicu y diseñador gráficu Rumaldo Antón Barbero de Diego, Ruma Barbero, resultó ganador de la séptima edición del premiu Alfonso Iglesias de Cómic por El viaxe a la lluz. El xuráu destacó “la orixinalidá y complexidá de la historia, l'interés temáticu y la renovación de les soluciones gráfiques y cromátiques”.

La gala, cuntó cola actuación musical d'Anabel Santiago y Xulio Arbesú.

Visita la nuesa galería de semeyes de la gala

Contador Estadistiques