Los equipos asturianos viven una xornada negativa

El Sporting y l’Uviéu nun pudieron sacar un resultáu positivu nes sos visites a los campos del Athletic Club (3-0) y del Mirandés (2-0) esti fin de selmana. Mentes, el Caudal nun pasó del empate en casa col Zamora (0-0). El filial del Sporting foi l’únicu que dio una allegría al superar al potente Eibar (2-0) en Mareo.
 
L’equipu de Manuel Preciado llegó a San Mamés cola moral peles nubes tres una racha de tres trunfos siguíos, la mesma que l’equipu vascu, pero pronto viose que l’Athletic taba más enchufáu nel partíu. Ocasiones clares precedieron a un penalti absurdu de Grégory sobre Llorente que tresformó David López y que dexó a los xixoneses con 10 pola segunda amarilla del francés. Col partíu cuesta arriba, el Sporting lluchó en busca del empate, pero Toquero y Llorente sentenciaron.
 
L’Uviéu ofreció la so cara mala en Miranda de Ebro nun choque ante un equipu, el Mirandés, que ta lluchando por algamar puestos de play-offs. Los de José Manuel cedieron ante los burgaleses na segunda metá tres unos primeros 45 minutos igualaos. Pablo y Ubis foron los autores de los tantos. Onde nun hubo goles foi nel Hermanos Antuña nel choque ente’l Caudal y el Zamora, un resultáu que sirve a los de Mieres pa siguir sumando de cara a la permanencia. L’otru conxuntu asturianu de la categoría, el Sporting B, sumó tres puntos importantísimos nel so encuentru col Eibar gracies a l’actuación de Juan Muñiz.