Los ecoloxistes refuguen la variante de Muñigu

Nestos alcuentros que se celebraron n'Avín, los grupos ecoloxistes llegaron a delles conclusiones sobre laxestión y futuru del Parque Nacional más antiguu d'España, rescamplando ente elles la refuga a la construcción de la Variante de Muñigu, que pa los ecoloxistes nun concasa col plan de regulación del tresporte en Parque, col que los grupos participantes nel alcuentru sí que concueyen, incluyendo toles midíes que se contemplen nel relatives al pieslle al tráficu rodáu de la xubida a Los Llagos, una midida que va echar a andar el 26 d'esti mesmu mes de xunetu y que correspuende a una reivindicación de vieyo del movimientu ecoloxista.Carlos Lastra, responsable d'Amigos de la Naturaleza Asturiana y portavoz de los alcuentros, sorrayó que nun pue facese una midida d'esti tipu, qu'iguala al parque natural asturianu colos demás parques, que tamién llenden la entrada de coches, y dempués pretender facer otru accesu rodáu nuevu al espaciu protexíu. Los grupos qu'aconceyaron esti fin deselmana n'Avín creen incluso que'l Plan de regulación del tresporte nel Parque vien con retrasu y que ye curtiu d'oxetivos, en cuantes que corta'l tráficu a los Llagos pero dexa que los coches lleguen a Cuadonga al empar que Cabrales y Caín queden ensin un tratamientu afayadizu

La situación alministrativa del parque, que por sentencia xudicial ta baxo tutela de les autonomíes que lu comparten y non del Ministeriu de Mediu Ambiente, tamién esmolez a los grupos ecoloxistes, que piden una xestión unificada pa que cada parte del parque nun tenga de mandase por planes de xestión distintos

El llobu, la especie más polémica de les que viven en parque, tamién tuvo'l so tratamientu nos alcuentros, que solicitaron que se faiga un control seriu de la especie ensin facer casu de presiones de sectores interesaos en desaniciar la especie.