Los ecoloxistes denuncien los vertíos del metrotren de Xixón

La Coordinadora Ecoloxista d'Asturies presentó esta selmana alegaciones contra la obra pa entamar un nuevu vertederu en conceyu Caravia nel qu'echar la tierra y l'escombru de la obra del túnel del metrotren en Xixón

Los ecoloxistes califiquen de "sorprendente improvisación" la llinia que tan siguiendo la constructora Necso y el Principáu colos 450.000 m3 de tierra que se sabía que diben salir del furacu del túnel del tren y que nun se tenía pensao d'antemano onde diben echase.

La depresión de Duyos en Caravia, ye'l llugar hasta onde se propón agora carretar 100.000 metros cúbicos de tierra, amestándose Caravia a otros vertederos que se lleven emplegando dende qu'entamó la obra, casu de l'antigua mina abandonada de Berbes en Ribeseya, l'ampliación del puertu del Musel, l'antiguu vertederu d'ENSIDESA en Sotiello, la playa de la Cueva en Ribeseya y otros vertederos pequenos espardíos pela redolada de la obra. Los ecoloxistes llamenten que nel momentu d'entamar la obra nun se presentare un Estudiu d'Impactu Ambiental conseñando nelli los llugares de vertíu y que, en cuenta d'ello, se propongan cada pocu tiempu puntos de vertíu que se dan de pasu con un "estudiu preliminar". La Coordinadora pide que se preste atención a cuestiones como'l comportamientu de la piedra, la presencia na basa de componentes contaminantes o l'efectu sobre recursos hídricos, amás del efectu del pasu de miles de camiones.