Los ecoloxistes d'Avilés aleguen contra una planta de gas en San Xuan de Nieva

Delles asociaciones de vecinos, ecoloxistes y grupos políticos refuguen la
instalación en San Xuan de Nieva d'una planta de gas licuao, que de
facese, diría xusto nel mesmu llugar onde yá s'echó
p'atrás un proyectu pa instalar una planta
d'abonos químicos. El proyectu ta en manes de la Conseyería d'Industria.



El proyectu abandéralu la casa Zeta Gas, y inclúi seyes
tanques reondos con capacidá pa 5.865 metros cúbicos y
un gasoductu dende'l muelle de Raíces, arriendes de delles instalaciones
suplementaries. La planta procesaría hasta 120.000 tonelaes al
añu de gas licuao pa tresformalo en butano y propano, y crearía
sobre 50 puestos de trabayu, según les previsiones de la empresa.



La Coordinadora Ecoloxista d'Avilés, que yá-y presentare nel so día alegaciones al Conceyu d'Avilés pol proyectu, ta cabante de facer otru tanto esplicándo-y la Conseyería d'Industria los puntos en
que nun ta d'alcuerdu cola planta, que promueve la compañía mexicana Zeta Gas. Los ecoloxistes dicen que'l proyectu nun
contempla delles normatives de seguranza en materia de tratamientu del gas, y
que'l riesgu que conlleva la planta ye grande al tener cerca los
depósitos d'acidu sulfúrico d'Asturiana de Zinc, too ello
arriendes de tar pegando cola Playa l'Espartal, que lleva tiempu recibiendo
tratamientos de protección y onde una parte d'ella ta declarada Monumentu
Natural.



La compañía mexicana Grupo Zeta Gas, que ta entamando a
operar nel mercáu ibéricu, ta estudiando la posibilidá
d´invertir nel noroeste de la península, onde quier poner una
planta na que recibir el gas procedente del Mar del Norte, Golfu Pérsicu
y norte d'África. El grupu empresarial orixinariu de México ta
dedicáu al almacenamientu, vienda, tresporte y distribución de
Gas Llicuao del Petroleu (GLP) con una facturación anual penriba los
2.000 millones de dólares y tien presencia nos Estaos Xuníos y en
dellos países d´América Llatina. L'oxetivu cimeru de Zeta Gas ye
arramplar con cuota de mercáu al actual líder y
cásique monopolista del sector, Repsol Butano. Pa facese una idega del
mercáu de que tamos falando, el mercáu del butanu
domésticu mueve al añu nel estáu l'equivalente a 100
millones de bombones de butanu de 12,5 kilos caúna.

Les infraestructures de gas de Zeta tendríen de repartise en
dellos puntos xeográficos, anque la clave pasa por atopar un bon puertu
con una importante capacidá d´almacenamientu. Como primer entrada
na península, la casa mexicana yá tien en construcción una
planta n'Escombreras (Cartagena-Murcia), mientres que la segunda planta d'almacenamientu
taría nel centru de la península, lo más fácil ye
que seya en Madrid. La tercer planta, qu'atendería'l norte de la
península, ye la qu'entovía nun tien allugamientu afitáu,
teniendo la compañía trés posibilidaes, Galicia, Sagunto y
San Xuan de Nieva (Castrillón) onde yá la
compañía "Gas Zaragoza" filial de la multinacional
mexicana presentó un proyectu pa poner una planta d'almacenamientu de
GLP. Esta planta, que s'asitiaría bien cerca de la playa del Espartal,
recibió un carráu d'alegaciones de partíos
políticos y asociaciones ecoloxistes a nivel municipal, qu'agora vuelven a repetise nel buzón de la Conseyería d'Industria.

El Puertu d'Avilés ye la entidá que más tien que ganar col proyectu, en cuantes qu'ello traería un tráficu de barcos metaneros al pequeñu puertu avilesín, que tien siempre enfrente la competencia de El Musel, pero la oposición a la planta gasística nun vien namás de les organizaciones ambientalistes. Asturiana de Zinc, la industria más fuerte que s'asitia na ría d'Avilés, presentó nel so día alegaciones contra'l proyectu a nivel municipal, daqué que s'esplica porque la presencia de Zeta Gas torga les posibilidaes de crecimientu de la fábrica de Zinc y porque la peligrosidá de los tanques de gas pue influyir tamién l'actividá na fábrica d'AZSA