Los ecoloxistes avilesinos dicen que l’aire del conceyu nun va poder respirase

El Colectivu Ecoloxista d'Avilés denunció esta mañana al traviés d'un comunicáu de prensa que la calidá del aire nel conceyu, contra toles anuncies oficiales, ta mui perbaxo de los niveles que sedríen aceptables pa la salú. El grupu diz que d'echar a andar tolos proyectos de nueves instalaciones industriales que tan previstes n'Avilés y la so redolada l'aire va volver ser irrespirable

El grupu denuncia que la población d'Avilés y la so contornada lleva dende va décades sufriendo enfermedaes respiratories y otres venceyaes de tipu cardiovascular, de güesos y malformaciones conxénites derivaes toes elles directamente del problema de la contaminación atmosférica.

Amás de denunciar que'l coste económicu en vides humanes y sobre la calidá de vida paez que nun se quier evaluar, el colectivu denuncia que les autoridaes anecien en falar de la bona calidá del aire que se respira mientres se preparen proyectos ente los que rescamplen la planta de fertilizantes de San Xuan de Nieva y otres como la térmica de ciclu combináu de Valliniello o la incineradora de Cogersa, que va asitiase mui cerca d'Avilés y que va ser la mas grande d'España y que van ser grandes xeneradores de contaminación, polo que piden que s'apare la so construcción.

Sigún los ecoloxistes, los datos de contaminación d'Avilés qu'apurre'l Gobiernu asturianu a partir de les estaciones automátiques de medición de la contaminación asitiaes n'Avilés son claros indicadores de que la contaminación perpasa tolos topes, lo mesmo en partícules sólides que en dióxidu d'azufre y de nitróxenu, mientres que d'otros contaminantes como'l bencenu y el plombu nun se fexo medición por carecer d'aparatos pa ello con ser obligatorio. Los ecoloxistes avilesinos alvierten que la falta de lluvia nel 2005 que llimpiare l'atmósfera a lo llargo de munchos díes de xuro va facer que les estadístiques de contaminación del 2005 vayan ser peores que les del 2004.