Los ecoloxistes avilesinos denuncien que la térmica de Nubleo "vien rebotada de Cantabria"

El Colectivu Ecoloxista d'Avilés emitió ayeri un comunicáu en qu'afita la so posición a la escontra de la construcción de la central térmica a gas con ciclu combináu que quier llevar alantre la empresa irlandesa ESBI en Nubleo - conceyu de Corvera, dientro de terrenos que se-y dieren a últimos de los 80 a la empresa DuPont pa que s'asitiare n'Asturies. Amás de llamentar qu'otra empresa venga a beneficiase del suelu que se-y diere a la multinacional química, los ecoloxistes dicen tamién que nun tien xacíu asitiar otra térmica cuando n'Asturies " sóbranos corriente" una afirmación que documenten col datu de qu'Asturies produz más del doble de la electricidá que produz, y cuando amás la zona ya ta contaminada abondo por otres industries asitiaes na so contornada .

El grupu d'ecoloxistes avilesinos llamenta que'l grupu térmicu que propón ESBI se reciba polos cargos públicos asturianos "colos brazos abiertos" cuando la mesma empresa fracasó nel so intentu de facer esti grupu nel conceyu cántabru de Corrales de Buelna, una llugar tamién castigáu pola reconversión industrial, como remembren los ecoloxistes, y nel qu'asociaciones de vecinos crearon una plataforma contra'l proyectu, pal qu'a la fin decidió la so empresa titular buscar otru allugamientu, ello con ser Cantabria importadora de corriente y non esportadora como Asturies y polo tanto teóricamente más interesada na llegada d'una central térmica.

La Coordinadora tamién sorraya los impactos de les emisiones a l'atmósfera de la central, que, anque va quemar gas, tamién pue emplegar gasoil. Les cuentes de los ecoloxistes avilesinos periten pal proyectu de Nubleo, de 800mw de potencia, unes emisiones de 290 tonelaes a la hora de dióxidu de carbonu, 250 Kg a la hora d'óxidu nitrosu (450 en casu de quemar gasoil), y 510 Kg a la hora de dióxidu d'azufre.