Los cupos de pesca pal 2005 decídense na UE

Directores Xenerales de Pesca de les comunidaes autónomes del Cantábricu tuvieron ayeri pela tarde una reunión na qu'apautaron un consensu de "mínimos irrenunciables" sobre los cupos de pesca pal añu 2005, que van debatise en Bruseles el prósimu día 20. La propuesta que firma'l Gobiernu asturianu pide unos permisos pa la pesca de la cigala y del pixín que nun concueya coles restricciones que quier apautar la UE nin col paecer de los grupos conservacionistes

Los "mínimos irrenunciables" de los conseyeros incluyen la eliminación de la propuesta de vedes, sacantes una veda temporal pa enfrente de la costa gallega, que nun s'aplique'l plan de recuperación a los barcos que piesquen menos de 5.000 kilos de merluza al añu y que les cuotes y plazos de pesca nun supongan en nengún casu "efectos traumáticos" pa les flotes respectives.

Contra esti criteriu de los conseyeros de pesca del Cantábricu, la organización internacional Oceana diz que l'estáu de les reserves de cigala, merluza y pixín del Cantábricu y de Galicia, y de bacaláu del Mar del Norte tan cerca d'escosar y que yá nun puen aguantar más pesca. L'anchoa ye otra especie mui dañada, según Oceana, y asina, mientres que pal 2004 encamentóse dende l'ICES, organismu d'espertos que depende de la Comisión Europea, baxar la cuota d'esta especie a les 11.000 tonelaes, los ministros de pesca permitieron un cupu de 33.000, dexando la biomasa d'esta especie nunos niveles qu'encamienten, según Oceana, nun pasar de 5.000 tonelaes esti añu, un tope pel que los responsables de pesca de dellos estaos miembros dicen que nun van aceptar. Si l'anchoa sufrió unos índices de pesca que triplicaron lo que s'encamentaba, el pixín multiplicó por cuatro les cifres aconseyaes, lo que lleva a Oceana a pidir que se pieslle'l Cantábricu a la pesca d'esta especie y tamién a la merluza, un pexe que ta pendiente de que se presente un plan pa la so recuperación nel cantábricu
Más información nel dossier d'Oceana sobre cupos de pesca na UE