“Los cuatro últimos díes en Villabona foron un torbolín de sentimientos”, recuerda l’insumisu Fernando González

‘El pesu la llibertá (insumisa)’ ye’l tercer llibru de Fernando González Rodríguez, una novela que va presentar esti vienres na Casa Sindical de Xixón. “Ye un testimoniu real”, esplica l’autor, que pasó 432 díes presu nos 90 por negase a facer el serviciu militar obligatoriu.

El xixonés cuenta nesta obra autoeditada “los últimos cuatro díes que paso en Villabona por insumisu”. Un llibru nel que llector va topar “les vivencies d’un presu, nesti casu d’un presu políticu, dende la nueche qu’él piensa que ye la última en prisión, porque cree qu’al día siguiente va salir, pero nun saldrá hasta cuatro díes depués”, rellata.

“Son cuatro díes que foron un torbolín de sentimientos. Pienses que vas salir y van pasando los díes, les hores, y nun sales. Y llega un momentu en qu’esa ilusión por salir pasa a ser desesperación total y pienses que nun vas salir hasta la llibertá total, pa lo que falten un montón de meses”, esplica l’autor. “Y cuando tas nel fondu, vuelven eses sensaciones a dar la vuelta, esa montaña rusa, y ye cuando dicen ‘recueye too que te vas’ y vuelve otra vez el xubidón anímicu… Los últimos minutos, esos últimos metros, hasta salir de la última barrera de Villabona”, sigue.

Una historia qu’arranca la nueche del 6 de xunetu del 97 y acaba na tarde del 10 de xunetu del 97, “pero’l llector y llectora van topar non sólo esos cuatro díes al detalle, sinón tamién saltos hacia atrás, porque esos cuatro díes, cuando tas na celda esperando la salida, que ye imposible dormir pola ansiedá, lo que faes ye una valoración d’esos 14 meses que pasasti presu, un montón de recuerdos y tamién suaños a futuru, y eso tamién vien nel llibru. Flashbacks que cuenten lo más interesante d’esos 14 meses de conderga y tamién lo qu’a un preso-y pasa pola cabeza eses hores antes de salir en llibertá, esos suaños de futuru, esos planes de vida”.

Rellación con ‘Diario de un insumiso preso’ de Fueyo

Entrugáu pol motivu d’escribir esti rellatu agora, cuasi 20 años depués, González esplica que lu llevó “otra novela qu’escribió nel 2015 otru insumisu presu asturianu, Carlos Fueyo Tirado, ‘Diario de un insumiso preso’”. “Enantes pasóme’l borrador y yo siempre-y reprochaba que cuenta tola historia dende que lu detienen, pero non la salida de prisión. Mete muncha presión ‘quiero salir, quiero salir’ y muncha ansiedá, y acabóse’l llibru. Y nun lu convencí pa que punxera un final”, recuerda.

Finalmente “convencióme él a min: ‘por qué nun escribes tu y cuentes el final tuyu y el de Paco’, que salimos a la vez de Villabona. Entós la novela d’él llevó a que yo escribiera cuasi’l so final de la so novela, pero camudando’l personaxe y l’añu”.

González y Paco, Francisco Álvarez, pasaron xuntos 1 añu y 4 díes; 14 meses y 14 díe; 432 díes. Y el periodista y gallardonáu escritor va tar presente esta tarde a les 18.30 hores na Sindical na presentación ‘El pesu la llibertá (insumisa)’, un actu que va conducir Natalia González Menéndez, de Matadero Uno, xunto colos otros cinco insumisos colos que coincidieron nel tiempu na cárcel y otros que tuvieren presos enantes

“Tamién van dir munchos militantes de la Coordinadora Asturiana pola Insumisión. En definitiva, un gran númberu de persones de lo que foi nos 90 el movimientu d’insumisión y antimilitarista d’Asturies”, apunta l’autor.