Los conductores asturianos perdieron 970 puntos nuna selmana

Según los datos asoleyaos esti fin de selmana pola Xefatura Provincial de Tráficu, la Guardia Civil retiró 970 puntos a 289 conductores asturianos na primer selmana d’aplicación del nuevu sistema de carné de conducir per puntos. Les causes de sanción centrarónse en tres principalmente.

La primer causa foi conducir con una elevada tasa d’alcohol en sangre, con 60 casos que llevó arreyao la retirada de 284 puntos. La segunda causa foi circular a una velocidá escesiva, produciéndose 59 denuncies cola perda de 145 puntos. Finalmente nun emplegar el cinturón de seguridá con 56 sanciones foi la tercera de les causes, retirándose 168 puntos.

El cuartu motivu de penalización foi l’usu del teléfonu móvil al volante, contabilizándose 33 sanciones y la perda de 66 puntos. Hai que señalar que la inmensa mayoría de los sancionaos nes carreteres asturianes fueron homes, que concentraron 263 de les 289 denuncies.

En cuantes a los conductores menores de 25 años, éstos acumularon un total de 44 sanciones.

Los responsables de Tráficu n’Asturies fixeron una primer valoración de los resultaos obteníos nos controles realizaos nes carreteres del país durante los primeros siete díes d’aplicación del permisu de conducir per puntos, destacando’l “descensu de forma significativa del númberu d’accidentes y infracciones”. Si nel añu anterior nel mesmo periodu hebo 65 accidentes y seis persones muertes, esti añu contabilizáronse 41 accidentes ensin qu’hubiere nenguna muerte.