Los conciertos de San Xuan

San Xuan ye una cita clásica pa munchos que quieren pasalo bien sintiendo un conciertu de folk, equí facemos un repás a les distintes propuestes qu'hai per Asturies pa pasar esta nueche del 23 de xunu.

N'Uviéu va xuntar la música y el teatru pa que la plaza la catedral tenga un daqué especial y máxicu esa nueche. El grupu de teatru "Margen" va facer un espectáculu con más de venti actores p'ambientar la plaza, pa que dempués, a eso de les 21:00 hores actue'l gaiteru ganador del Memorial Remís Ovalle, Jorge Suárez Carbajal. Darréu, a les 21:30, llega, va tocar el dúu formáu por dos nomes propios del folk, Fred Morrison y Jamie McMenemy. Gaiteru'l primeru y bouzouqueru'l segundu tienen la bona costume de venir a visitanos ca poco, y por exemplu dempués d'esta actuación van volver a tocar n'Uviéu'l sábadu 26 nos Alcuentros de Trebolgu de los que vos informaremos detalladamente esta selmana. Dempués d'esta pareya y de la foguera volvemos al folk de casa con "N'Arba" que van pesllar la nueche.

Cerquina d'Uviéu tenemos un menú que tamién puede ser bien prestoso. Dende pela tarde la música asturiana van andar sonando peles cais de Llugones, los cantantes Ismael Tomás, Jorge Tuya, Rosario Torres y el gaiteru El Pravianu van ser la banda sonora de la tarde xunta los xuegos tradicionales. Les actuaciones folk vienen de mano de "Felpeyu" y los ingleses "Flook" que van actuar dempués de prender la foguera a les 00:00 hores. "Flook" son un cuartetu formáu por Sarah Allen cola xiblata de metal y el curdión, Brian Finnegan cola xiblata de madera, Ed Boyd na guitarra y Jon Joe Kelly col bodrahn. Va tiempu nesti grupu tocó'l perconocíu xiblateru de "Capercaille" Michael Mcgoldrick, pero dexó la banda por otros proyectos musicales. Con cuatro discos "Flook" ye una de les bandes más importantes del folk internacional.

En Xixón namás qu'hai una actuación central, y va ser la de la voz de Chus Pedro xunta la so banda cola que van interpretar los temes del so discu "De Ñublu y Orpín". El cantante de "L'Entregu" va cantar enantes y depués de la foguera que como ye norma tamién préndese a les 00:00 hores.

Corvera solía ser el conceyu que ponía enriba la mesa'l cartel más grande y completu, pero la decisión del Conceyu de Corvera de nun apostar por esta celebración fai qu'esti añu San Xuan de Corvera tenga un programa más probetayu, anque nun como pa desprecialu. La nueche va tener la presencia d'una formación de música clásica, "Divertimento", y trés grupos de música folk "Cántara", Fred Morrison y Jamie McMenemy, que repiten actuación nuna nueche, y "Ástura". Un bon cartel, pero que nun tien na que ver colos d'años anteriores onde pudimos ver a les bandes más importantes de folk asturiano, "Llan de Cubel", "Tejedor", "Xéliba", Felpeyu" y del folk internacional como "Dervish" o "Tanahill Weavers".