Los conceyos de la ‘Comarca de la Sidra’ premien la llectura d'obres n'asturianu de les sos biblioteques

Esti xueves presentóse en Nava la campaña d’animación a la llectura ‘Lleer n’asturianu tien premiu’. Los usuarios de les biblioteques públiques de los conceyos de la Mancomunidá ‘Comarca de la Sidra’ van recibir una ficha-marcapáxines onde poder dir sellando cada empréstamu y, al final del añu, recibir un llibru de regalu.

Esta iniciativa del Serviciu de Normalización Llingüística de la mancomunidá pretende dar visibilidá y promover la llectura de los fondos n'asturianu de les sos biblioteques. La campaña incluí la edición d'un cartelu, una pequeña guía de llectures y la ficha-marcapáxines que poder trocar nun futuru por dalguna de les novedaes editoriales n'asturianu de los años últimos.

Amás, mañana, con motivu del Día de les Lletres Asturianes, el SNL y l'asociación El Ronchel, de Villaviciosa, va facer l’habitual repartu de lletres de pan pelos centros escolares pa conmemorar esta xornada. Dambes iniciatives presentáronse esta mañana na Biblioteca Pública José Fernández Guerra nun actu que contó cola presencia del presidente en funciones de la mancomunidá y alcalde de Bimenes, Aitor García Corte; los conceyales Luis Vicente González Moro (Villaviciosa), Jairo Palacio Vigil (Nava) y Manuel Rodríguez Onís (Bimenes); y el responsable del serviciu, Pablo X. Suárez.