Los conceyales uviedinos González De Mesa y Iglesias Caunedo engárrense na salida del Plenu

Arturo González de Mesa (FAC) y Agustín Iglesias Caunedo (PP) insultáronse y amenazáronse a la salida del Plenu municipal d’esti martes. El conceyal de Foro pidió disculpes al popular de manera pública tres l’incidente.
 
El fechu tuvo llugar segundos depués de que l'alcalde, Gabino de Lorenzo, felicitara a tolos integrantes de la Coporación pol ambiente del Plenu que, nes sos pallabres, "ta ameyorando" depués de delles sesiones tenses. Según pudieron observar los conceyales, los periodistes y el públicu asistente, De Mesa convidó a Caunedo a dir a "tomar pel culu" depués de que, de forma paralela a lo que se trataba nel Plenu, ésti reprochara al tamién conceyal Juan Pérez Zaldívar les sos "continues interrupciones" a los turnos de pallabra y lu amenazara con un "yá te garraré".
 
De siguío, y mientres abandonaben la sala, tanto De Mesa como Caunedo profesáronse espresiones del tipu de "macarra" o "ehí ta'l demócrata". "Nun me pongas la mano enriba, nin 'rozada'" alvirtió De Mesa a Caunedo, al que separtó'l so compañeru de partíu Alberto Mortera. Tiempu depués del incidente, el conceyal de FAC pidió perdón de manera pública al popular que, nun comunicáu, aceptó les disculpes.