Los clubes escueyen la proximidá pa facer los subgrupos de Tercera

El cambiu de votu del Valdesoto dio la mayoría a la propuesta del CD Praviano.

Los clubes de Tercera División decidieron na tarde d'ayeri la composición de los dos subgrupos de la categoría pa la campaña próxima, na que van competir 21 equipos tres l'ascensu final del CD Lealtad a Segunda División B por decisión federativa tres l'anulación de la fase de repesca. Anque nuna primer votación ganara la propuesta 1, la de la Real Federación de Fútbol del Principáu d'Asturies basada na clasificación anterior, na segunda votación ente les dos con más apoyos la modificación de criteriu del club sierense llevó a que saliera finalmente escoyida por 11 a 10 la 3, la del Praviano, que tien en cuenta la proximida xeográfica.

Asina nel subgrupu 1, de 11 equipos, van tar l'Avilés, l'Avilés Stadium, el Navarro, el Caudal, la SD Lenense, el Mosconia, el Praviano, el Vallobín, l'UC Ceares, l'UD Gijón Industrial y el Llanera. Mentes, nel 2 van competir el Colunga, el Llanes, l'Urraca, el CD Tuilla, l'EI San Martín, L'Entregu, el Real Titánico, el Siero, el Valdesoto y el Condal.

La competición va principiar el 18 d'ochobre, en principio con públicu con asientos acutaos previamente, según el protocolu de la Federación.

Na semeya, campu de Santa Cruz, que va acoyer un añu más un derbi xixonés.