Los clubes catalanes alcuerden trabayar pa la “internacionalización” de la seleición de Catalunya de fútbol

|

Fútbol Club Barcelona, Espanyol y los clubes catalanes que militen en Segunda y Segunda División B comprometiéronse a trabayar pa la “internacionalización” de la seleición del país. Namái L’Hospitalet refugó roblar esti conveniu.

La Plataforma ProSeleccions Esportives Catalanes ye la impulsora d’esti alcuerdu que se firmó’l llunes nel Palau de la Generalitat baxo la mirada del president Artur Mas, qu’agradeció a les entidaes deportives firmantes el so "sentíu de país" y el so compromisu con Catalunya. "Lo que se pretende ye la normalidá", aseguró Mas, que defendió que Catalunya pueda competir como seleición propia internacionalmente y que, amás, hai base abondo pa llogralo. Por último, señaló que ye un ésitu que la Plataforma llograra l’apoyu de los clubes y aseguró que la internacionalización del país en competiciones deportives "nun tendría que causar tantes alarmes".

Los asistentes al actu foron el presidente del Barcelona, Sandro Rosell; el del Espanyol, Ramon Condal; el del Girona, Joaquim Boadas; y el del Sabadell, Miguel Ángel Sánchez, esto ye, los dirixentes de los cuatro clubes catalanes del fúbol profesional. Amás, tamién tuvieron representaos los equipos de Segunda B Llagostera, Lleida Esportiu, Prat, Reus, Sant Andreu y Gimnàstic. El presidente de la Plataforma ProSeleccions Esportives Catalanes, Xavier Vinyals, indicó na so intervención qu'hai una mayoría de catalanes qu'apuesten pola seleición catalana y que "l'acuerdu algamáu esti llunes va ser un referente pa otros deportes y pal país". Per parte de los clubes, intervino la presidenta del Llagostera, Isabel Tarragó, qu'indicó que'l fútbol ye'l primer deporte de Catalunya y que "los sos clubes han de ser los primeros" n'abrir camín.

Na semeya, Rosell, Vinyals y Mas.

 

Contador Estadistiques