Los centros de día y sociales autonómicos abren la selmana qu’entra

De manera progresiva, cola incorporación de los usuarios por fases pa minimizar los riesgos de contaxu del coronavirus. Asina van abrir les sos puertes los centros de día y sociales de la rede autonómica la selmana qu’entra pa beneficiu de cuasi 2.000 usuarios.

La conseyera de Derechos Sociales y Bienestar, Melania Álvarez, aconceyó güei con representantes municipales pa coordinar l’apertura de estas instalaciones, con presencia de l’alcaldesa de Caravia, Salomé Samartino; el de Nava, Juan Cañal; el de Taramundi, César Villabrille; la de Villayón, Estefanía González; y el de Castropol, Francisco Javier Vinjoy. Na xunta esplicó-yos les fases nes que los usuarios van dir podiendo acudir a los centros de día y centros rurales d’apoyu diurnu, asina como a los centros sociales.

L’aforu disponible va ser del 30 por cientu de la capacidá de la instalación nos primeros 15 díes, que va aumentar hasta el 50 por cientu na quincena siguiente y al 75 por cientu, na tercera, tope máximu na normalidá nueva. Va haber, amás, dos llendes pa l’apertura: los recursos d’apoyu diurnu que tean integraos nuna residencia nun van abrir, y tampoco los centros sociales que comparten espacios con centros de día.

Los centros sociales que nun cuenten con recursu d’apoyu diurnu van abrir con una máxima ocupación del 30 por cientu del aforu. Esti mismu nivel d’aforu afitóse nes cafeteríes d’estes infraestructures, mentes que los servicios de podoloxía y peluquería van tar abiertos con cita previa.

Na semeya, el Centru de Día de La Camocha.