Los candidatos d’ ocho partíos políticos reciben una carta de la Fundación Caveda y Nava na que solicita un consensu sobre la llingua

Javier Fernández (PSOE), Isabel Pérez-Espinosa (PP), Jesús Iglesias (IX-Verdes), Francisco Álvarez Cascos (Foro Asturias Ciudadano), Rafael Palacios (Bloque por Asturies-UNA), Juan Morales (Ideas), Ignacio Prendes (UPyD) y Xuan Xosé Sánchez Vicente (Unión URAS-PAS) tán acabantes de recibir una carta de la Fundación Caveda y Nava. Esta institución solicita a les ocho formaciones un consensu sobre la llingua asturiana, tal como asocede en Galicia col gallegu.
 
Ramón d’Andrés, presidente nuevu de la Fundación, tien el deséu de que s’incluya na axenda eleutoral el debate sobre la oficialidá del asturianu cola fin de buscar un consensu nesti tema asemeyáu al algamáu en Galicia. Asina, señaló trés idees básiques: que la llingua asturiana cuerre peligru de desapaición, que ye una llingua del Estáu español y que precisa de midíes eficaces. “En Galicia toos tienen claro que'l gallegu ye una llingua y hai que tirar por ella. Depués, caún tien los sos matices”, aseguró.
 
El presidente de la Fundación fixo estes declaraciones nuna rueda de prensa na que tuvo acompañáu pol escritor y patronu Xuan Bello. Ésta celebróse en conxunto con Rafael Palacios, candidatu del Bloque por Asturies-UNA a la presidencia d’Asturies, y Yolanda Huergo, vocera de la coalición, tres un aconceyamientu pa tratar asuntos relacionaos col asturianu.