"Los bonos interpretes saben cuándo siguir la tradición o cuando enxertar técniques d'importación"

Julio Sánchez-Andrade, conocíu del públicu por ser, a lo llargo de munchos años, el batería del grupu "Nuberu" ta acabante de consiguir pola so tesis doctoral "La percusión en la música tradicional de la cornisa cantábrica: Asturias" el segundu premiu nel concursu "Marqués de Lozoya" que convoca tolos años el Ministeriu de Cultura y que premia les meyores tesis doctorales y trabayos d'investigación n'humanidaes
. La tesis destaca pol gran trabayu de campu fechu, recoyendo'l llabor d'años del autor, qu'atropó cientos de testimonios de músicos tradicionales per tola xeografía asturiana. Sánchez-Andrade defende na so tesis doctoral la riqueza del patrimoniu acústicu de la música asturiana y la so vixencia actual y proyección hacia'l futuru, argumentando que la llinia de tresmisión oral ente xeneraciones d'esta música nun ta rota.

Sánchez Andrade echó años de llabor pa preparar esta tesis doctoral que presentó'l mes de payares, obteniendo la másima calificación del tribunal de la Universidá d'Uviéu. N'Asturies.com falamos col yá doctor pa interesanos sobre esta interesante investigación


-Yes un músicu de formación clásica y profesor de conservatoriu ¿d'onde te vieno l'interés pol mundu de la música tradicional?

-Probablemente'l fechu de llevar más de venti años acompañando a «Nuberu» -tocando la batería y participando en dalguna ocasión nos arreglos y incluso na composición de dalgún de los temes del grupu- nun quiera dicir que yo tenga una rellación estrencha cola música tradicional d'Asturies, en cuantes qu'el dúu qu'integren Chus Pedro y Manolo nun la interpreta de mou purista; pero con too y con ello, les más de les pieces que faen el so repertoriu sí pertenecen al repertoriu asturianu, col que llevó tratando musicalmente d'entós p'acá.

Per otru llau, cuando me propunxi realizar la Tesis Doctoral, el tema de la percusión na música tradicional d'Asturies foi'l que me paeció más rellacionáu cola mi llabor didáctica en Conservatoriu de Música de Xixón. Dende esi momentu la mi curiosidá foi mayor y propúnxime afondar nel so estudiu.

-Na tesis vese un gran trabayu de campu ¿cuantu tiempu te llevó esta fase de la obra y que ye lo que mas destacaríes de la esperiencia colos numberosos informantes qu'apaecen na tesis?

-Considerando como parte del tema les campanes d'ilesia -perteneciente al trabayu d'investigación doctoral previu- tuvi cerca de trés años visitando a más del centenar d'informantes dende Cangas del Narcea hasta Llanes. Aparte, col trabayu de síntesis, trescripción, conclusiones y edición del trabayu, ello llevóme hasta un total de seis años.


Les esperiencies más destacables al tienen que ver col aspectu humanu, les conversaciones qu'aporten muncho. En rellación col asuntu más técnicu de la percusión, dende'l primer momentu sorprendíome la seriedá, el conocimientu y la pasión de munchos de los intérpretes, de la importancia tan grande que tien esti tema pa ellos.


Na tesis apaecen percusionistes de gran veteranía y representantes de les xeneraciones más nueves ¿Crees qu'esiste un saltu xeneracional ente la manera de tocar d'unos y d'otros?

-Creo que podría falase de dos niveles d'informantes: los de primer llinia y los de segunda. Nel primer casu refiérome a los de mayor edá y que tienen un contactu más allegáu a les lleendes de la tradición, qu'interpreten el repertoriu tal como-yos lu enseñaron, ensin pretender aportar novedá nenguna d'importancia. Nel segundu, trátase d'intérpretes más mozos, almiradores y respetuosos cola tradición, pero qu'incorporen unos recursos técnicos sorprendentes y, en munchos casos, de gran virtuosismu. Lo interesante del asuntu ye que dambos sirven p'apreciar el rumbu, la dirección que sigue la execución d'un repertoriu tan ricu. Nesi sentíu sí puede falase d'un saltu xeneracional

-Siguiendo un poco'l filu de la entruga anterior, dende va aproximadamente un cuartu de sieglu hai instrumentos de percusión y ritmos nuevos que, introducíos mayormente por grupos folk tan faciéndose col repertoriu tradicional ¿como crees qu'afecta esto a la percusión tradicional? ¿ta una sostituyendo a la otra o podemos falar d'una simbiosis ente les dos?

-En realidá, toos esos instrumentos d'incorporación nueva van pertenecer a la tradición asturiana en pocos años. Tengo escuchao estremar claramente lo que ye tocar el repertoriu tradicional -al xeitu tradicional- y les recreaciones y ellaboraciones de los grupos que se llamen de folk. El mou en qu'estos usos novedosos afecten a la percusión tradicional ye mui complicáu; pero, simplificando l'asuntu podríemos dicir que l'arriquecen y que -col tiempu- van acabar remocicándola. De momentu, hai intérpretes que nun l'acepten de nenguna manera y otros que llogren una hibridación mui positiva. En xeneral, los interpretes cuidadosos saben cuándo deben siguir la tradición lliteralmente o cuando puen enxertar técniques d'importación, meyorando asina'l resultáu.

-Una pregunta mui concreta, como investigador y como percusionista: El tambor asturianu ye oxetu d'una cierta polémica, y mientres unos quieren caltenelu tal cuál ta, otros son partidarios d'evolucionar los sos materiales pa meyorar la estabilidá de l'afinación ¿por qu'opción te marques?

-Si fales con constructores actuales como Andrés Valdés, el d'Insierto, o Ángel Vega, de Xixón, van dicite que respeten los materiales y la forma de construyir los instrumentos -teniendo estudiaos los que fabricaron los constructores históricos-, anque incorporen los avances técnicos que tienen al alcance pa facer instrumentos más perfectos pero semeyantes a los que se facíen va munchos años. Si vas tocar en pareya, cola gaita, yo nunca utilizaría un tambor que nun fuere'l tradicional, toi refiéndome al de cascu de madera -meyor de nozal que chapa- cuerda de cáñamu o pita pa tensar, apretones de piel de vaca, parches de piel d'oveya o de cabritu, retañes de tripa de gochu o asemeyao, etc. Otru asuntu son los instrumentos que s'empleguen nes bandes de gaites, nes que pa llograr un soníu más uniforme nel timbre y n'afinación fabríquense con otros materiales.

P'acabar, y teniendo en cuenta la importancia del premiu que tas acabante de consiguir y la estensión d'un trabayu que te llevó 6 años, ¿ties dalguna delda d'agradecimientu?

Por supuesto, munches. Tengo delda d'agradecimientu con muncha xente. En primer llugar, el director de la Tesis, José Antonio Gómez Rodríguez; trabayar con elli foi lo más prestoso y tranquilizador. Ye mui esixente, pero'l resultáu ye notoriu; amás hai que contar tamién col so sentíu del humor y la so amistá.


Cola priesa, na llectura de la Tesis escaecióseme citar a delles persones d'importancia vital. Fernando de la Puente Hevia ye un gran conocedor del folclore, que m'ayudó colos sos comentarios, mostrándome munchos caminos pa esplorar. Maribel López Parrondo tien un dominiu singular de la tradición del Suroccidente -refiérome a les castañueles, pandeiru, pandereta, etc.-. Fonsu Fernández, director del Muséu de la Gaita, pue falar de temes apasionantes, conversando animadamente y aportando bayura de datos.


Amás, Pelayo Duarte y Javier Lueje, na edición del vídeu; Mateo Luces, na edición de les partitures; Ton Prendes, nel discu colos audios; Alberto Fernández Varillas; MacNolín Durán, Fe Santoveña, Eva Tejedor y Rosa Fernández, foron profesores d'escepción; Luis Vallina nel diseñu… de xuro que se m'olvida dalguién y que voi sentilo, porque cuando se fai un trabayu eshaustivu pue tenese la tentación de pensar que tol méritu ye d'ún, pero nun ye asina, ye'l resultáu de munches y sabies collaboraciones.