Los Berrones van tocar en Corvera nos festexos pol Día d’Asturies

|
Pablo León y Iván Fernández García presentación Día d'Asturies 2022 en Corvera

Corvera acueye esti añu la recuperada celebración entamada pol Gobiernu depués de que nun se puedieren organizar dos años pola pandemia. Va ser coincidiendo cola festividá del conceyu y va incluyir más 30 actividaes con una docena de grupos folclóricos y conciertos como’l d’Algaire, Chus Pedro y Pipo Prendes o’l de Los Berrones.

Cabrales foi, nel 2019, l’últimu conceyu en ser la sede del festexu pol 8 de setiembre, y Corvera, que yá tuviera l’honor nel 1987, col cantante italianu Franco Battiato como reclamu principal, garra agora’l relevu. Un mercáu, actividaes infantiles, una muestra del folclor y exhibiciones de xuegos y deportes tradicionales, ente otros actos, van tener llugar repartíes per toles parroquies.

El pasucais de la Fanfarria El Felechu, de Los Campos a Les Vegues, va abrir la xornada festiva a les 11 hores, mentes que’l mercáu, asitiáu nel parque d’Europa de Les Vegues, va tener actividá dende’l meudía. Hasta la medianueche, cuando van llanzase los fueos artificiales y dar pasu a la orquesta Waykas nel prau de la fiesta, nun va haber momentu pal descansu, rescamplando los conciertos d’Algaire (13.30 hores, Cancienes), Argayu (17.30 hores, Les Vegues), Anabel Santiago y les Pandereteres de Fitoria (18 hores, Cancienes), Chus Pedro y Pipo Prendes (19.30 hores, Les Vegues) o Los Berrones (22.30 hores, prau de la fiesta en Les Vegues).

La cultura sidrera tamién va tener un güecu na xornada festiva cola clase maxistral que van impartir dellos echadores nel parque d'Europa de 12 a 14 hores. Otru de los encantos pal públicu asistente va ser la exhibición del globu aerostáticu que'l Gobiernu contrató como soporte promocional de ‘Asturias, Paraíso Natural’, que va realizar vuelos cautivos col públicu que lo quiera previa reserva nesti enllaz.

Cartelu tamién en gallego-asturiano

El cartelu pol Día d'Asturies, nos años últimos billingüe, incorpora per primer vegada'l gallego-asturiano. Asina, pue lleese 'Día de Asturias', 'Día d'Asturies' y 'Día d'Asturias', anque'l programa namái ta disponible en castellanu y asturianu.

Na semeya, Pablo León, direutor xeneral de Cultura y Patrimoniu, y Iván Fernández García, alcalde de Corvera, posen llueu de la presentación del Día d'Asturies 2022 xunto con dalgunos de los participantes nes actividaes programaes.

Contador Estadistiques