Los Berrones lleven la so música a la xixonesa ‘Semana Negra’

Los Berrones completen esti miércoles, a les 22.30 hores, los conciertos nel escenariu central de la ‘Semana Negra’ que tienen a la llingua asturiana como protagonista. Los de Tolivia tomen el relevu de La Tarrancha y de Xera.
 
Con un públicu siempre fiel, la folixa diaria habitual de la ‘Semana Negra’ va multiplicase esta nueche cola presencia d’esti grupu clásicu de la escena musical asturiana. Los creadores del ‘agro-rock’ van ufrir cantares del so discu últimu, ‘Ad libitum’, pero tamién van repasar la so discografía nuna cita que promete diversión y bona música.
 
Los de Tolivia, que recién participaren nel discu-homenaxe a Xentiquina versionando ‘La moto Pachín’, cantar que ye posible que suene esta nueche en Xixón, tán metíos anguaño na so tradicional xira braniega. Amás del conciertu de la ‘Semana Negra’, tienen confirmaes actuaciones en Boñar (14 d’agostu), Llanes (15 d’agostu) y Cangas del Narcea (19 d’agostu).