Los Berrones lleven el premiu al meyor cantar n'asturianu de l'Academia de la Música

Los veteranos Los Berrones recibieron el vienres de nueche'l premiu de l'Academia de la Música na categoría del Meyor Cantar n'Asturianu, pol que tamién competíen Dixebra y el cantante Viocente Díaz. Anque nengún de los componentes del grupu se desplazó hasta Madrid p'asistir a la entrega de premios, Ramón, cantante Los Berrones, amosó la so allegría por un premiu col que nun contaben.

La entrega de los premios de l'Academia de la Música, entidá venceyada a la SGAE, coincidió col día de les lletres asturianes, 5 de mayu. Poro ente los músicos asistentes a la manifestación de la Xunta pola Defensa de la Llingua y l'actu de l'Academia de la Llingua había cierta espectación por ver quien llevaba'l premiu, anque nengún miembru o representante de Dixebra nin de Los Berrones, grupos colos que pudo falar Asturies.com, foi pa Madrid p'asistir a la entrega de premios. Asina, cuando'l cantante de Los Berrones asistía a la espicha de l'Academia de la LLingua que se celebraba nel Hotel la Gruta d'Uviéu, recibió la noticia de que'l cantar del grupu "Fai Deporte" ganara'l premiu na edición d'anguaño de los premios

El cantar ganador "Fai Deporte" grabóse en collaboración ente'l grupu de Tolivia y un garapiellu de deportistes asturianos d'élite, ente ellos los ciclistes Santi Pérez, Chechu Rubiera, Benjamín Noval o Samuel Sánchez, los futbolistes Samuel Baños, Pablo Álvarez y Paul Folgueras, l'árbitru Mejuto González, la karateka Noelia Fernández o l'alpinista Rosa Fernández, col oxetivu de recaudar perres pa una causa benéfica a primeros del 2005.