Los Berrones, la so carrera nun discu

Quince años de carrera musical merecen un discu que lo recueya
too, y con esta sida sal lo último de "Los Berrones", un doble
cd, un DVD y un llibru quieren ser un homenaxe a la carrera de los de
Tolivia.



Nel local de la SGAE d'Uviéu presentaron ayeri xueves pela
mañana "Los Berrones" el que pue llamase'l discu de
definitivu de la banda, o polo menos, una auténtica enciclopedia d'un de
los grupos más celebres de la escena asturiana y española.
Ellí los componentes del grupu, Tante, Olegario y Ramón falaron
sobre esta publicación qu'incluye un doble cd colos meyores cantares de
la banda, un llibru onde topamos semeyes, historia y anécdotes d'estos
quince años de carrera, y un DVD cola actuación del grupu en
Xixón el pasáu mes d'agostu onde tocaron delantre de más
de 20.000 persones, y onde punxeron enriba del escenariu tol montaxe que lleva
la banda nos sos directos. El DVD enxerta tamién tolos videoclips promocionales de la banda a lo llargo de toos estos años, incluyendo'l famosu "nun yes tú" colos alloriantes subtítulos en castellanu que-y punxere nel so día TVE



"Los Berrones" comentaron qu'esti discu "ye como un
regalu pa nós, porque siempre suañamos con facer un discu en directo,
amás la presentación ye perguapa y tamos seguros de qu'a los
nuesos siguidores va paga-yos el tiru mercalu ". No que cinca al
repertoriu del directu apuntaron que "nél vamos topar los
cantares que solemos facer la banda nos conciertos, pero tamién otros
temes que nunca nun ficiéramos en directo y que preparamos pa la
ocasión".



Pal futura la banda piensa namás agora en promocionar esti
discu, y salir d'Asturies. Ello ye que van facer dellos
conciertos en Madrid, Bilbao y Galicia, porque consideren qu'esti discu ye
"una bona tarxeta de presentación pa esportar el productu
fuera". Lo que si ye seguro ye que pa los siguidores de "Los
Berrones" va ser imprescindible dafechu tener esti resume de tantos
años na música, y qu'albidra un futuru pa la banda, llarga vida a
"Los Berrones".