Los Berrones entamen una xira pel Estáu pa celebrar los sos 35 años

Cantabria, Galicia y Madrid son dalgunos de los llugares nos que va facer parada la xira ‘Añu 1 D. C. (Dempués del COVID)’ de Los Berrones, colos que los de Tolivia van celebrar nel 2022 los sos 35 años de carrera. El conciertu que va abrir la mesma va tener llugar nel Auditoriu del avilesín Centru Niemeyer el 8 de xineru.

“Ye una xira especial na que van participar artistes de cada zona con nosotros”, adelantaron Ramón Blanco y Olegario Méndez esta mañana na presentación celebrada nel llar de la SGAE n’Uviéu. Asina, na cita n'Avilés, con entraes yá a la venta por 24 euros, van contar cola participación de la Banda de Música de Pravia.

Amás, Los Berrones estrenen imaxe en redes sociales y páxina web, onde van dir actualizándose toles informaciones d’esti añu tan especial. Tamién van facilitar próximamente a los sos munchos siguidores una tienda en llinia con productos nuevos del grupu.

Feches confirmaes

Depués de la cita n’Avilés del 8 de xineru (20.30 hores), que va abrir la xira ‘Añu 1 D. C. (Dempués del COVID)’, los creadores del agro-rock tienen confirmada fecha nel Escenario Santander de la capital cántabra’l 7 de mayu. El 4 de xunu van viaxar a Santiago de Compostela pa tocar na Sala Capitol y el 24 d’esi mes, a Madrid, na mítica La Riviera.

Na semeya, Mendéz y Blanco col cartelu de la xira.