Los autónomos piden al Gobiernu guarderíes en polígonos y rebaxes fiscales a muyeres

Rosa Suárez, presidenta d’Asociaciones Federaes d’Autónomos d’Asturies, solicitó al Gobiernu guarderíes en polígonos y rebaxes fiscales pa muyeres qu'ainicien proyeutos. Un 41 por cientu de los autónomos del país son muyeres.
 
AFAS considera necesaries rebaxes fiscales pa les muyeres que quieran poner en marcha un proyeutu propiu, amás de la creación de una rede de guarderíes en polígonos industriales o na so rodiada pa que les madres puedan tener a los sos fíos cerca del so centru de trabayu. Suárez fixo estes declaraciones en Xixón enantes de la inauguración d’una xornada informativa sobre la muyer trabayadora na que tamién participaron l’alcadesa de la ciudá, Paz Fernández Felgueros, y la de Llangréu, Esther Díaz, ente otros. La intención d’esta actividá yera la dar a conocer les oportunidades qu’ofrez l’autoemplegu a les muyeres n’Asturies y el contestu económicu y políticu qu’atopen a la hora d’exercer una actividá profesional por cuenta propia.
 
La presidenta d’esti coleutivu tamién manifestó qu’Asturies ye una de les comunidaes con más muyeres autónomes n’activu, con un 41 por cientu. Amás, animó a les muyeres a delegar les sos funciones nel llar pa poder dedicar el so tiempu a otres actividaes profesionales.