Los atentaos tocaron les bolses

Los atentaos d'esti xueves en Madrid echaron pel suelu los mercaos bursátiles ente'l pánicu xeneralizáu. Anque la versión española sobre l'autoría apuntaba pa contra ETA, los analistes económicos acolumbraron la mano d'Al Qaeda tres de les verdaes oficiales dende'l primer momentu, y ello tiró p'abaxo pelos índices énte un futuru de gran d'inestabilidá xeopolítico internacional.

Asina, les bolses internacionales tuvieron delles cayíes importantes énte una posible campaña internacional d'atentaos islámicos escontra intereses d'Estaos Xunios y los sos socios. Wall Street tuvo una selmana permala anque'l vienres trancó en positivo. L'índiz Dow Jones tuvo una xuba del 1,10% hasta los 10.240,8 puntos mentanto que'l tecnolóxicu Nasdaq medro un 2,10% pa mangase nos 1.984,71. Les bolses del Vieyu Continente recuperaron menos de mediu puntu nel pieslle del vienres pasáu.

El parque madrilanu esfarrapló cola masacre en Madrid. L'Ibex-35 asitióse nos 8.032,60 puntos lo que supón una cayida nel conxuntu la selmana del -3,76%. De fechu la Bolsa de Madrid foi la bolsa con mas perda de toles europees. L'índiz Ibex llegó a perder nun intre la cota sicolóxica de los 8.000 puntos. Los valores que pero resultáu tuvieron foron Metrovacesa, NH Hoteles, Amadeus y Sol Melia. El Grupu Telefonica tuvo una mala selmana con cayíes xeneralizaes, y Mapfre foi de los pocos que tuvieron un pieslle en positivo.

L'Euru cayó un 1,4% énte un dólar que recuperó parte de lo perdio nes últimes selmanes. La falta d'enfotu del BCE nuna recuperanza económica fuerte fizo desconfiar a dellos inversores de la divisa europea. L'oru tamién tuvo una cayida perimportante del 1,6%. El bonu a diez años de referencia, l'alemán, asitióse la selmana pasada nuna rentabilidá del 3,892. La mano integrista tres de los atentaos de Madrid tamién tiró, esta vez p'arriba, pel preciu del petroleu