Los asturianos vense poco representaos na TV

La Unión de Consumidores d'Asturies fizo públicu ayeri'l so sondéu mensual d'opinión, que tuvo por tema nesta edición la creación de la TV autonómica. La encuesta telefónica de la UCE constaba de trés cencielles entrugues sobre la TV y fízose a los consumidores y usuarios que ficieron consultes al serviciu d'atención de la UCE'l mes anterior.

A la primer entruga, sobre'l conteníu de les programaciones de les distintes canales de TV, una gran mayoría de los encuestaos respondieron que nun-yos gustaben un res, mientres que namás un 6% dixeron que-yos gustaben muncho y un 38% declararon que-yos paecíen "regulares".

La segunda entruga, sobre'l tratamientu de la realidad asturiana nes canales de TV, foi la que tuvo una contestación más unánime, y dexó un 88% de persones respondiendo que-yos prestaría ver más información de la realidá d'Asturies na TV, mientres que namás un 3% dixeron qu'Asturies tien tratamientu afechiscu nes programaciones de TV. Al rau d'esta, la tercer cuestión pidía directamente la valoración sobre la creación d'una canal pública de TV asturiana, dexando un resultáu al favor de la iniciativa: un 64% ven "mui favorablemente" la creación de la TV y un 16% "bastante favorable". Sicasí, esta ye una cuestión que nun dexa güecu a términos medios, y asina mientres namás un 3% ven "regular" la creación de la TV esiste un 15% que se declaren contrarios a ella