Los asturianos van poder escoyer ente 16 candidatures nes xenerales

Dieciséis partíos políticos van presentase a les xenerales del 20-P por Asturies, de los que quince tamién aspiren a entrar nel Senáu. Doce d’estes candidatures tuvieron que presentar más de 989 avales pa poder tomar parte nes eleiciones.
 
Mentes, les formaciones con representación parllamentaria, esto ye, PSOE, PP, IX y UPyD, quedaron lliberaos pola Llei Eleutoral nueva que supunxo un llistón mui altu pa munches formaciones como Democracia Nacional, les distintes ‘Falanges’ o Alternativa Motor y Deportes, que participaren nes xenerales anteriores y que desapaecen nestes. Asina, de les 29 opciones d’hai trés años se pasa nesta ocasión a 16.
 
El llistáu final de candidatures pa la cita coles urnes del 20 de payares ye la siguiente: PSOE (Antonio Trevín), PP (Mercedes Fernández), Izquierda Xunida (Gaspar Llamazares), UPyD (José Ignacio Prendes), Andecha Astur (Arturu Xosé Bermeyu), FAC (Enrique Álvarez Sostres), PCPE (Raúl Martínez Turrero), Solidaridad y Autogestión (Francisco Goméz del Castillo), PACMA (Marta Jimeno), Partido Humanista (Juan Antonio López Gómez), Por un Mundo más Justo (Isaac Rafael Álvarez Fernández), Equo (María del Pilar Calvo Holgado), Unificación Comunista de España (María de las Mercedes Torre), Partido Democrático y Constitucional (Arturo García Rodríguez), Hartos.org (Miguel Ángel Villalba Menéndez) y Escons en Blanc (Luis Prado). Pal Senáu se presenten los mesmos partíos, a esceición del Partido Democrático y Constitucional.