Los alcaldes del Consorciu de la Montaña Central nun lleguen a un alcuerdu pa nomar xerente

La negociación ente los alcaldes IX-LV de Mieres y Ḷḷena, y los socialistes de Morcín, Riosa, La Ribera y Ayer pa nomar al xerente del Consorciu de la Montaña Central sigue ensin avanzar. La coalición proponía a Marcos Cienfuegos.
 
Los alcaldes caltuvieron esti llunes un conseyu que se disolvió ensin acuerdu sobre'l nomamientu como xerente de Cienfuegos, ex conceyal d'IX-LV en Mieres. Los socialistes opunxéronse al sueldu propuestu polos rexidores de la coalición, de 35.000 euros, y piden que namái cobre en conceutu de dietes, como'l so antecesor, Juan José Pulgar. Al términu del alcuentru, l'alcalde de Mieres y presidente del Consorciu de la Montaña Central, Aníbal Vázquez, señaló que "vamos volver a reuninos porque tamos avanzando; hubo ciertu averamientu de postures". Al empar, fixo especial insistencia en "la bona voluntá pa llegar a un alcuerdu". Sicasí, tovía nun se marcó una fecha pal próximu conseyu del Consorciu de la Montaña Central.
 
Nesti mandatu, IX-LV tien un pesu na zona ensin precedentes dende l'entamu de la Democracia. Nes eleiciones últimes, la coalición garró l’alcaldía de Mieres y gobierna con mayoría absoluta en Ḷḷena.