Los Aguilandeiros de San Xuan de Villapañada, primer mazcarada d'iviernu en salir

|
Cartelu Aguilandeiros de San Xuan de Villapañada 2018

Van pidir l'aguilandu esti domingu.

Los Aguilandeiros de San Xuan de Villapañada, mazcarada recuperada nel 2014 tres siete décades ensin entamase, tán preparándose pa celebrar mañana el so día, qu'atrai a un bon piñu de persones de dientro y fuera del conceyu de Grau. L'escobón, les pareyes de maragatos, l'osu, la dama y el galán, el médicu, el cura o'l diablu son dalgunos de los 18 personaxes que la integren y que van partir a les 9.30 hores del Albergue de San Xuan.

D'ehí van tomar direición hacia Rozadas, pa depués pasar per Acebéu y La Llinar, y finar de nuevo en San Xuan al rodiu les 15 hores, onde va siguir la folixa hasta les 17 hores pa finar cola celebración d'una merienda nel campu la Ilesia. Nesti percorríu, la comparsa va dir pidiendo l'aguilando peles cases, animando la xornada a tolos vecinos de la parroquia.

La de San Xuan de Villapañada ye la primera del calendariu asturianu de mazcaraes d'iviernu. A Los Aguilandeiros van siguilos Os Reises del Valledor, El Guirria de Ponga, Os Reises de Tormaleo, Los Sidros y La Comedia de Valdesoto y los Guilandeiros de Tinéu.

 

Contador Estadistiques